Nama 51. hanuere 12, 1918.

Te Kopara.

Registered at the G.P.O. as a Newstpaper. 

Te Oranga mo tenei Pena e Rima Hereni mo te Tau

Te Kopara.

NAMA 51. GISBORNE. HANUERE 12, 1918

"Iti te Kopara kai takirikiri ana i runga i te Kahikatea."

Te Pa Tapu.

KUA horo te Pa Tapu kua horo a Hiruharama ! Kei te hari te Hahi Karaitiana kei te koa no te mea ka whitu rau tau inaianei e kore ana te Haki Karaitiana e kapakapa i runga i nga parepare o Hiruharama katahi rawa ano kei tenei ra. Kei te tangi te Hurai i te hari me te koa i te waimohio kua tae mai ki a ratou ka hoki mai to ratou kainga ki a ratou ano me te mea katahi ano nga rangi ka whakao mai ki o ratou auetanga o enei tini rau tau ka pahure nei.

He mea miharo rawa te horonga o Hiruharama i roto i tenei pakanga nui he mea kei te miharotia e te ao katoa. Kei te ahu whaka-terawhiti katoa te whakaaro o te tangata inaianei kei te kimi kei te rapu he aha ra te tikanga o tenei mea. " Ko te wa ianei tenei e Ihowa e whakahokia ai e koe te Kingitanga ki a Iharaira ? (Mahi I. 6). " Ko tau kohikohinga mai ranei tenei i tou iwi i waenganui i nga tauiwi i nga topito o te ao, a ko tau whakahokinga i a ratou ki to ratou whenua ?" Ehekiere 36. 24).

1 E Ihu, e te Kingi nui
Hohorotia e koe te ra
E tino whakapono ai
Te ao katoa ki to Ingoa.
Ae ra, e Ihu, tangohia
Te ao katoa hei kainga mou.

2 Tukua e koe te rongo pai
Kia rere haere i te ao.
A whakamatea rawatia
Nga mahi a te rewera.
Ae ra. e Ihu, tangohia
Te ao katoa hei kainga mou.

3 Tonoa e koe au karere
Kei kauwhau i te oranga
Kia whakapono ra ano
Nga pito o te ao katoa.
Ae ra. e Ihu, tangohia
Te ao katoa hei kainga mou.

"E te Atua tohu, nau i hanga nga tangata katoa, kahore koe e kino ki tetahi mea i hanga e koe, kahore hoki ou hiahia

kia mate te tangata hara, engari kia tahuri ia kia ora; Tohungia nga Hurai katoa, nga Turaka, te Hunga whakateka, me te Hunga whakapono he, whakakorea to ratou kuare, te pakeke o o ratou ngakau, me te whakahawea ki tau Kupu arahina mai hoki ratou ki tau kahui, e te Ariki e whakapaingia atu nei, kia whakaorangia ai ratou i roto i te toenga o te Iharaira pono, kia kotahi ai te kahui, kotahi nei hoki te hepara ko Ihu Karaiti, ko to matou Ariki, e ora tahi na me koe me te Wairua Tapu, kotahi ano Atua, ake ake ake. Amine."

He Reta tuku mai.

KUA tae mai te reta whakamarama ki Te Kopara, kia panuitia mo runga i te ra o te whakatuwheratanga o Te Poho o Tamaterangi, Wairoa, me to Nukutaimemeha, Puanani, Carterton, he noho tu-tata tonu no nga ra, ko te reta i tukua mai nei, na Meiha H. P. Tunuiarangi, Hanuere 10, 1918. Ara, he inoi atu ki nga rangatira whakahaere o Te Poho o Tamaterangi katoa, kia ngawari mai koutou ki te neke atu i te ra o tena whare o tatou he opuru tonu hoki ki te ra o tenei whakahaere a tatou. - Meiha H. P. T.

Whakapaanga Minita.

No te 23 o Tihema ka taha nei i whakapangia ai a Nepia Hotene rana ko Waata Kopae hei rikona, me Matene Keepa hei piriti; ki te wharekarakia nui i Nepia. I te mea kei te takoto mate te Atirikona o Heretaunga riro ana na te kai-whakaako o Te Rau Kareti (Rev. F. W. Chatterton) i hoatu te hunga nei ki te Pihopa.

Ko te kanwhau i tetahi o nga minita pakeha i a Rev. Eric Rice, a ko tana rarangi i tangohia mai i a 1 Kor. 4. 1-2, " He kai mahi na Te Karaiti ... tetahi e pono ana." Ko te whakarapopototanga o taea kanwhau he tohutohu ki te hunga e whakapangia ana kia mahara ratou koia nei te tino karangatanga nui atu o nga karangatanga katoa. Kia kaua e whaia ko nga painga mo tenei oranga a kia iti mo te oranga a mua. Kei mahi i tenei mahi i runga i te whakamanawa reka kia paingia ai e te tangata, engari ko te Atua ke ta tatou e mahi ai kia ahuareka mai, a kia whiwhi hoki era atu i runga i a tatou mahi tuari nei tatou no nga mea ngaro a te Atua, ki te oranga a mua. atu kia whakakororiatia ai hoki ko te Atua. Otira ko te huarahi e kaha ai tatou ma te inoi pono anake. Ehara i te mea i nga Ratapu anake engari i nga ra katoa, i

roto ake hoki i tou whare. Ko koutou e te hnnga ka whakapangia nei hei tauira mo to koutou iwi Maori, ka ngoikore koutou ka pena ano hoki to koutou iwi."

Ko Rev. Nepia Hotene, e haere ana ki Rotorua, a ko Rev. Waata Kopae e haere ana ki Nuhaka mahi ai. Ko Rev. Matene Keepa kei te hoki ano ki Turanga, engari kei a Maehe e heke iho nei ka neke ki te Pariha o Moteo, Heretaunga, a ko Rev. Mate Wharehuia ka haere mo te Pariha o Turanga.

NGA RONGO WHAWHAI.

Te Tai-Hauauru.

KEI te noho hu noa iho te Kotahitanga i tenei tai, heoi ano te mahi he whakau i te noho he pupuri hoki i nga wahi kua riro mai i te hoariri. Otira ko te tino take pea i kore ai te Kotahitanga e whawhai nui inaianei he whakaaro ki ana tangata ara kia whakanga ratou he wa tika tenei i te mea kei te tio te hukapapa kaore i arikarika te hohonu: tuarua ka tata ki te kotahi tau te Kotahitanga te whawhai ana i te Hauauru kaore he takiwa whakatahi o te whawhai. Ko te Tiamani anake kei te puku mahi kei te tohe kia pakaru te raina o te Kotahitanga i a ia. Ko te takiwa kei te tohe ia inaianei kia whati i a ia ko te takiwa ki te Wiwi. Kua kite ia he uaua te whawhai atu ki te Ingarihi no reira ka whakaaro ia me matua i te Wiwi i te tuatahi ka tahuri atu ai ki te Ingarihi. Ka rua ana kokiritanga i te Wiwi he aha te aha.

Te Whawhai i te Tai-Rawhiti.

Te Maunga-rongo.

KAORE ano i tino tau te maunga-rongo i waenganui i a Tiamani rana ko Ruhia. te hore rawa pea tenei maunga-rongro te tau no te mea ko o Ruhia hiahia kaore i te matareka ki a Tiamani waihoki me o Tiamani hiahia kaore i te matareka ki a Ruhia. Te hiahia o Ruhia kia hoki rawa atu a Tiamani ki roto i ona rohe a kia whakahokia mai ona wahi kua raupatutia te Tiamani. He take uaua tenei ki a Tiamani. Ara atu te nuinga o nga take te hiahiatia ana te tetahi taha me tetahi taha no reira ki te whakaaro atu kaore rawa te tau te maunga-rongo i waenganui i a raua.

Nga Itariana.

KEI te nui te whakawhirinaki o te Iwi ki to ratou Kawanatanga. He tohu pai tenei he tohu kei te kotahi te iwi.

I whakamatau ano nga Ahitiriana me nga Tiamani kia whitikia te awa o te Piawe (Piave) te ratou otira ko ratou te papa i nga Itariana.

Ko te tokomaha o nga hoia o te Itariana kei te marae o te pakanga inaianei te 5,320,000, me te matohi ano mo nga mea kua kahore.

Parihitini.

E WHA nga pa ki te taha whakarunga o Hiruharama kua riro mai i te Kotahitanga, ara i a Tianara Allenby te tianara nana i whakahoro a Hiruharama. Kotahi mano nga Taake me nga Tiamana i mate rawa te ono rau i riro herehere. te rua tekau nga pu mihini i riro mai.

Taare R. Parata, M.P.

No te Turei te 8 o nga ra o Hanuere nei i puta ai te whakaatu i nga nupepa kua moe a Taare R. Parata, mema Maori o Te Watipounamu, i te moenga roa. Haere ! te te hoa, ki te iwi, ki te okiokinga. Korerotia atu nga ahuatanga o muri nei. Tena koutou katoa te nga whanaunga o tenei o tatou kai-hautu o te iwi Maori i roto i te whare wananga o nga mahi a te pakeha te tuwhera mai ra i Poneke. Ma te Matua i te wahi ngaro koutou katoa te whakamarie.

Pitopito Korero o te Whawhai.

I roto i te ripoata a Ta Takerei Heiki (Sir Douglas Haig) mo te ahua o te whawhai i tera tau nei (1917) i tino nui tona whakamihi ki te ope manuao o Ingarihi. I mea ia na nga manuao o te Ingarihi i totika ai matou te whawhai nei i te tuawhenua a ko matou te whawhai atu nei i tawahi nei kua tino kite i nga painga o te ope manuao o Ingarani. Mei kore aua manuao kaore matou te whawhai atu nei te tupu totika. Inakoa he mahi uaua te tuku kai mai tangata mai ranei mea whawhai ranei ki a matou te noho atu nei i te tima-ruku o Tiamani te haere tonu nei te ao te po te ai he wa whakatahi. Otira te tae ana mai enei mea katoa ki a matou, kaore rawa e hapa.

E £25,000 te moni hei kohinga ma te iwi Maori hei oranga mo nga hoia Maori; a o taua moni kua kohia inaianei £14,000. E kore e roa ka eke.

Kua mau ano nga Tiamani kotahi tekau i rere nei i Motuihi. E waru o ratou ra i ngaro ai ka kitea ano, a kua whakahokia mai ano inaianei ki Niu Tirani nei. He ronihi noaiho to ratou poti i oma ai ratou i runga, engari tupono atu ratou ki tetahi kaipuke ko te Moa i te Moana e haere ana ka eke ki runga ka noho herehere nga tangata no ratou ake te kaipuke ki a ratou. E hia ranei ra i muri iho ka totohu te ronihi na konei i tere ai to ratou mau ara kore ana he huarahi omanga mo ratou ki uta. E kiia ana e te tima nana ratou i hopu e tere ana te haki a Tiamana i a ratou e rere ana a i mea ano ki te oma rokohanga ka puhia atu ko te tunga mai i tu ai. Mehemea he Maori hei tieki i enei Tiamana kaore rawa e konewa. Kei te haere he uiui inaianei i Akarana mo tenei take.

I mea a Von Luckner te mahunga o ana Tiamani ko wai e kore e oma i te mea ka waiho noa iho te huarahi kia tuhera ana.

Ka mutu te uiui a te Komihana mo nga Tiamani 11 i oma nei i Motuihi. Kei te hanga ratou i ta ratou ripoata inaianei hei whakatakototanga ki te aroaro o te Minita mo Whawhai.

Ko te kaute tenei o nga tangata me nga pu i taka mai ki roto ki nga ringaringa o te Ingarihi anake mai te timatanga o te tau 1917 ki te mutunga ara: -


Tangata.
Pu.
Hauauru
73,131
531
Parihitini
17,646
108
Mehopotamia
15,944
124
Awherika Rawhiti
6,728
18
Huihuinga
114,544
781

Ko te Ruihi o te Ingarihi - 


Tangata.
Pu.
Hauauru
27,000
166
Parihitini
610
-
Mehopotamia
269
-
Awherika Rawhiti
100
-
Te Haronika
202
-
Huihuinga
28,379
166

E 6,000,000 tangata te ruihi o Tiamani i roto i enei tau o te whawhai. Kotahi miriona e rima rau mano i mate rawa; e toru miriona i taotu engari e 500,000 tino he atu; e rua miriona keore rawa atu he painga.

PANUITANGA.

HEI te 22 o nga ra o Pepuere tu ai te Hui o te Hahi, ki Waipiro.

W. W. WAIAPU, Pihopa.

He Tangi mo nga Hoia Maori kua riro ki te Pakanga.

TENEI ra ahau to koutou hoa e nga manu tangi pai ta koutou mokai e oku ariki maha i tera wahi i tera wahi o nga ngahere maha o nga moutere Maori e tau nei i runga o te moana-nui-a-Kiwa te mihi atu nei: - 

Tena ra koutou! Tena ra koutou! Me nga tumanako hohonu kei roto i o koutou na ngakau, ko koutou anake nei te matau ana ki tona ahuatanga, ki tona nuinga, ki tona taumahatanga ranei.

Tenei hoki ahau te Kopara to koutou hoa iti rawa, te pikau nei i runga i te pokohiwi oku mahara maha i etahi tumanako nunui mo te taha whaka-tewairua, me te taha whaka-te-tangata, timata mai i te hotoketanga o nga tikanga e uhi nei te ao pango i runga i te mata o te whenua tae mai ki tenei ra. Kua kore ra e taea te whanga ki nga tohu o te tau. Ko ahau pea kei te ponana, kei te kipaina e nga haere o te wa. Tena pea he tau tukuroa tenei. Mehemea ra kei te penei, kaati ko ahau kei te pohehe. Ina ra tiro ake, kua matohu te Horirerire he tau hou. Te Karoro kua rere whakatuawhenua me te tangi - haroo. Ko te Weka ia kua kite rawa, a, tenei te kooe nei. Heoi ano ra ta te kukupa ko te ngunguru-u. Pai atu mei kore, no te mea he maunga rongo anake tana e tino ahuareke ai, na konei ra e nga hoa ki taku titiro iho kei te akuto te haere o nga tikanga o tenei wa, na reira ka hoki whakamuri te whakaaro, a ka kite iho ki nga tumanako o te ngakau mo te koanga o te tau, mo te ngahurutanga hoki o nga tikanga nunui ara whakate-atua, whaka-te-tangata. Mo te taha Atua, kei te tupu ra te whakapono i runga ano i to te wa ahua. Titiro ake e nga hoa i runga i ou tihi teitei - he pu-repo, he mataa kaahi (gas shells), he peneti, he manu-rere, he topito, me era atu tini mea whakawehi kei te ringa, kei te ngakau hoki o te karaitiana e tute ana i a raua karaitiana. He aha tenei ahua. Heoi ra, ko te tumanako mo Henare Wepiha Te Wainohu me ona hoa maha o ta ratou nei mahi e noho mai ra i te marae o te pakanga, tae mai ki tenei ra kei te tutuki. Ko te taha whaka-te-wairua ra tena. Otira ko te tumanako kei te ngakau o tena o tena o tatou mo te taha whaka-te-tangata kua tu mai he mea e tangi roimata ai te hinengaro me te tinana tangata, no reira e aku hoa maha, " He kaha ui Te Kaha," he aha ra i penei ai ? Tera kei te kai-hanga e matatu ana. Otira ko te ngakau o te tinana tangata kei konei noa mai o enei mohiotanga whaka-te-atua, Na reira ka tika kia mamae te ngakau maru, a kia tangi te tumanako-huakore. He tau tukuroa ra tenei. Ta tera tu manako, ta hau tumanako, taku tumanako, kei hea i roto I tenei ra ? Nga hua hou o te aiotanga kei hea ? Ko hea ra te

marae i hapa i tenei aitua ? Ka ngaro ra te momo o te tangata. Na reira, waiho ake ra nga tangi o te wa o te toitutanga o te wao-nui-a-Tane ki roto i te ngakau, engari me tangi i te reo o tenei wa hei whaka-mau-mahara ki o tatou rangatira, ki a koutou tamariki, ki a koutou mokopuna, me o tatou hoa katoa e tu mai ra etahi i roto i te mura o te ahi ko etahi e takoto mai ra i te marae o te pakanga he koha ki te Kingi, he honore ki te Atua. Ahakoa ra he tangi tenei na te ngakau maru, e tumanako ana te ngakau me kore e whai koha ki te hunga i roto i te mamae me te pouritanga, no reira to koutou hoa, ta koutou mokai e nga manu reo reka, e nga whakaaro nunui i roto i te aroha ka mihi atu tena ra koutou. He tangi ki te hunga kua riro ki te pakanga.

HAERE RA.

Rangi - " Blue Eyes."

E pari ra nga tai ki te akau
E hotu ra, ko taku manawa.
Aue! Haria mai te aroha ki ahau;
Te iwi e, he ngakau tangi noa.

Tena ra tahuri mai!
E te tau, te aroha!
Tenei ra ahau te tangi nei
Mo hou ka wehe nei.
Haere ra, mahara mai,
E te tau, kia mau ki au.
Haere ra! Ka tuturu ahau:
Hae-re ra!

Haere ra te Wiwi haere ra !
Haria ra te aroha i ahau
Aue! Me tangi noa ahau i muri nei.
Haere ra te Wiwi haere ra !

Aue! Ngaro noa koe e Tama,
Nga marae nei.
Ko te aroha e Tama
E peehi kino nei.
Kei Karipori koe e Tama
Kei Paranihi.
Aue te mamae e Tama.
Haere! Haere ra !

Kaore hoki e te po nei
Te heri wairua mai:
He aroha ki te Wiwi
Ka hinga i pa-mamao.
Kei Ihipa koe e Tama,
Kei Karipori ra ;
Kei Paranihi e Tama.
Haere! Haere ra!

Na P. H. TOMOANA, Waipatu.

Pitopito Korero.

I tae te Hon. A. T. Ngata ki te huihuinga o nga Kaiwhako kura Maori i Akarana. I roto i tana whaikorero i reira i mea ia " kua rite katoa ta te ngakau i tumanako ai mo te ahua o nga mahi e whakaakona nei i roto i nga kura Maori, engari ki tana whakaaro kua tae tenei ki te wa tika hei akonga i nga tamariki tane ki nga mahi a ringa. Ko te ora mo te Maori kei te ahuwhenua, a ko te tino mahi ma ratou ma nga Kai-whakaako he ono i te purapura o te mahi ki roto i a ratou he patu hoki i te wawata o tamariki tane kia mau "tiwhikara" ratou. I mea ano a Ngata ki a ia me whakatu tetahi kura tarawhe i nga tamariki. Hei reira titiro ai i nga mea e rawe ana mo ia ahua mahi mo ia ahua mahi kei nga roro o te tamaiti te tikanga. Mehemea he tamaiti tino matau me haere ia ki te mahi roia ki era atu huarahi pera ranei; mehemea ana hei tangata pamu me haere ki Lincoln Kareti ki te kareti mahi pamu, ki Hawkesbury Kareti ranei i Niu Tauti Weera. Ko te wahi tahangoi o te kaupapa o naianei ko te whakaako anake i nga tamariki ki nga mahi e tae ai ratou ki nga whakarnatautauranga o nga mahi roia, takuta, minita ranei. Ko nga tino mahi hei akonga ma te kotiro Maori ko nga mahi e kiia ai te kainga he kainga, ko nga mahi tiaki tamariki hoki.

I te taenga o te Mahita o Te Rau ki Nepia i te wa o te Kirihimete nei ka eke ia ki runga i tetahi kaipuke rere-rangi i reira he mano putu taua pikinga ki runga i taua mea. E: kiia ana i a ia ka noho ki runga i taua mea ka mea atu ia ki te kapene whakahau: " Kia tupato rawa kei raruraru to mea; kaore au e kaha ki te haere i runga i te kahu o te wai pera me te Mahita pai, ara me Te Karaiti."

E mihi ana nga kai-whakaako me ma tarnariki o Hukarere ki te aroha a nga minita Maori kua tae atu ki a ratou. I tenei tunga o te Hinota ka huri nei i tangohia e Rev. Hakaraia Pahewa etahi whakaahua o te Kura. E rua nga mea i whakaarahia, a tukuna atu ana e nga Minita Maori hei tohu aroha ma ratou mo te man,taki nui a Hukarere i a ratou i te wa o te Hinota.

TE RORU HONORE.

I mate rawa ki te whawhai. - H. Smith, C. Clark, Pera Hina, C. Wood, Nikora Te Tuhi, He Peri, H. Te Paro, Lance-cpl. Tepana Taurere, Manukau Hapuku, Hone M. Power, E. Toheriri,

J. Poutawera, P. Hohepa, Horomona Kanapu, Karena Wero Mohi (Cpl), Hori Kereama, Henare Hauiti, Pona Marunui, T. Wharepapa, Lance-cpl. Hori Takoko.

I mate taotu. - Prvt. T. Mihaere, Teruauwai Hunia, H. Rewharewha, Lance-cpl. Edward Angel.

Kua taotu. - O. Akuhata, H. Anaru, M. Panapa, P. Tahau F. Waipuke, W. Phillips, K. Harehuru, Sgt. C. Swanson Capt. J. Ferris, Capt. Wiremu H. Waaka , R. Taki, J. Kape T. Rapatine, Andrew Paul, M. Paraone, H. Teohu, P. Pera M. Terewa, Mahuika Herewini, Tamati Matiu, Hoani Piri Lance-cpl. Ngapera, Cpl. Remana Paenga, Cpl. J. W. Tepene Srgt. J. Grace, Joseph Paka, Second-lieut. Rauhira, Lace-cpl Roma Johuson, Pounari, Moa Williams, Hirini Waititi.

I taotu kei te puni tonu. - R. Harris, M. Hikamate, J. Moko S. J. Hunter, P. Rangitahi, W. Williams, R. Heperi, J. Bragg H. Matehaere. W. S. Smith, Lance-cpl. R. Matiu, Srgt. A. H. Rankin. 

Kei nga Hokipera ahua taumaha. R. Rawhira, H. Kopua.

I tuakiko. - Srgt. J. Grace, M. Herewini, T. Matiu, H. Piri H. Waititi, Lieut. T. Hetet, C. W. Hetet, Lance-cpl. Pauro Lance-cpl. Hale, Second-lieut. M. Tehuehue, J. Rapihere.

Kua mama te mate. - M. Turaka.

Ko te kaute tenei o nga hoia taotu, i hoki mai i te maara o te pakanga e 527. Kotahi rau ma wha nga mea kei te takoto tonu, ko te nuinga kua pai. Ko nga ingoa enei o nga hoia Maori: - 

Lieutenant Hamuera A. K. Ehau, Ohinemutu, Rotorua.
Puehu Hohepa, Galatea, Murupara.
Waa Hoko, Matauri, Kaeo.
Rewi Horomona, Whakaki, Hawke's Bay.
William W. Kaipo, Waitara, Taranaki.
Wi Rapata Kanara, Awanui North.
Rewe Kerehi, Tokomaru.
Tawhai Kohere, Kahukura, East Cape.
Hapimana Kokiri, Rotorua.
P. Pararaki, Maketu, Rotorua.
J. Tahitahi, Ahipara.
Hori Tangaere, Hikuwai, Tokomaru Bay.
Huitau Te Hau, Mahia, Haweks Bay.
W. Tre Pairi, Waimana, Wahakatane.
Rangi H. Ruru, Muriwai, Poverty Bay.
Charlie Kahukere, Te Ngae, Rotorua.
Kawenata Kemp, Okahia, Tauranga.
Tumanui Ngatipehi, Rotorua.
Amo Pene, Morrinsville, Waikato.
Tautoro Pomare, Kaikohe, Bay o Islands.
R. Te Meroi, Wellington.

HE TURE TUTURU.

1. Kotahi putanga o TE KOPARA ki te Marama.

2. Ko te oranga mo te pepa e rima hereni (5/-) ki te tau, me nooti o te poutapeta me pane kingi ranei.

3. Ki te hiahia te tangata 2 te tango ki TE KOPARA me tuku mai e ia te moni ki roto ki te reta whakaatu mai ki a - 

TE KOPARA, Te Rau Press, Gisborne.

4. Ko nga korero katoa e hiahiatia ana kia tangia ki TE KOPARA, me taku ki te Etita, ara kia - 

Rev. F. A. BENNETT, Kohupatiki, Clive, Hawke's Bay.

HE PANUI.

Ki te hiahia te tangata ki te Rawiri ki te Himene: he nui noa atu nga pukapuka kei a au inaianei: ko te utu: - 

Ha mea nui, kiri noa, 2/6.
Rawiri & Himene, kiri whero, 2/.
He mea nui, kiri whero, 3/.
Rawiri, Kawenata & Himene, kiri whero, 3/6.
He mea nui, kiri pai, 4/.
Rawiri, Kawenata & Himene, kiri pai rawa, 5/6.
He mea nui, kiri pai rawa, 5/6.
He Kupu ma te Ngakau Inoi, 3d.

Maku e utu te pane kingi hei toku atu i nga pukapuka ki a koe.

Na H. W. WILLIAMS, Naurea Private Bag, Gisborne.

Ki te hiahia te tangata ki te Paipera ki te Kawenata me tono ki te BIBLE DEPOSITORY SUNDAY SCHOOL UNION, Auckland.

Paipera. 2/6, 3/6, 4/6, me te pane kingi 1/-
Kawenata me nga upoko whakamarama, 2/6, 3/-, 4/6, me te pane kingi 3d.
Kawenata paku, me nga Waiata, 2/-, 2/6, 3/-, 3/6, 4/-, me te pane kingi 3d.

Printed and published by H. W. WlLLIAMS, at Te Rau Printing Works, Berry Street, Gisborne, New Zealand. - January 12, 1918,