anahera i te rangi, i panuitia mai e te pononga o nga herehere: i karangatia mai, i whakahokia mai e nga pari o Muriwhenua, me te mea he pari karangaranga, ka kapa tonu ra te ngakau o te iwi Maori i tona rongonga i tana kupu pai.

Kihai ia i pai kia kotahi anake te taenga mai, ahakoa taumaha tonu ia i nga Raruraru o tarawahi, hokihoki tonu mai a, i te whitu o ona taenga mai kaore i kaha ki te haere, i kawea i runga i te kauhoa kauwhau ai i tana kupu poroporoaki. Ka tae noa ia ki tona kainga mate tonu ia, me te mahara tonu ki te iwi Maori i te haora o te mate.

I enei ra o muri nei kua ngohengohe, kua whakaaro kore te tangata Karaitiana, kua peka ke atu ki te ara ngawari, kua whakakahore i te Ripeka: me titiro tatou ki te aroha u tonu, ki te manawanui, ki te tumanako, ki te uana, ki te ngakau-nui o Te Matenga.

Ka miharo ano tatou ki ta te Atua ata whakahaere i nga mahi o aua ra; i whakarite ai i te kaipuke kotahi o Te Matenga e hoki mai ana i Ingarani o Ruatara e mahi heramana ana. Kua tae a Ruatara ki Ingarani ki te rapu i te putake o te nui o Ingarani, rokohina noatia he nanakia, he tukino. A i te au moana ka kite aua tangata i a raua He mea ata whakarite e te Atua taua kitenga, kia waiho tetahi hei tautoko i te mahi a tera mo te Atua mo te iwi Maori. Kia mahara tatou ki te Atua kahore ano kia mutu taua ata whakahaere ana i nga mea o te ao i a tatou ake mahi hoki. Ahakoa kua pahure nga tau kotahi rau, kia mea tatou, "E whakapono ana ahau ki te Atua Matua, ki te Atua Tama, ki te Atua Wairua Tapu." Ina hoki ka kitea tonutia i te tupu o te Hahi ki tenei whenua te mahi a te Tokotoru Tapu, ara te aroha a te Matua te atawhai a to tatou Ariki a Ihu Karaiti me te tohutohu a te Wairua Tapu.

Kati tena. He mihi tenei naku, i hunga i te Ingoa o Te Karaiti, ki nga Mangai Reimana o te Hui, he Kai-karakia hoki te tokomaha. Ka whakawhetai ahau ki te Atua mo te wairua o Te Matenga kua tau na ki a koutou. A, ahakoa kaore koutou e whakanuia, e whakapaingia, kei te mahi koutou i te mahi ki te Ariki i ia wiki, i ia wiki; kei te karakia koutou ki nga kainga e kore e taea e te Minita Karakia ai. He mahi tapu tena, he mahi e manakohia e te Atua, he mahi taumaha. Rite tahi koutou me nga Minita: He pa koutou e tu ana i runga maunga, e kore e huna. Te hunga e minitatia na e koutou e whakarongo na ki to koutou waha, e titiro matatau tonu ki a koutou. Ehara pea i te hunga korero Paipera, engari ko koutou ano te pukapuka e korerotia tonutia e ratou; ko koutou, ara ko a koutou kupu, a koutou mahi, tuwhera tonu ki a ratou korerotia ai. Te kauwhau i kauwhautia ra i roto i te Whare-karakia, he mea iti noa iho tena, ko te tino kauwhau ko tena e kauwhautia na e a koutou mahi i ia ra, i ia ra. Ko wai ra ka mahara ki nga tino kupu i kauwhautia e Te Matenga i te Ra Whanautanga 1814 -  kei te moe te kai-kauwhau ra, ka ngaro ana kupu - ko tona aroha nui whakaharahara ia te mea mau tonu, akiaki tonu i te ngakau tangata. Ka pera ano te tikanga mo tatou aianei, ahakoa minita, ahakoa kai-karakia, ehara i te kauwhau-awaha engari te kauwhau-a-mahi, tena te mea pa taringa. E kore tatou e noho huna.

Tetahi mea e matea ana e te Hahi inaianei, he apa minita kua oti te whakatapu. Kia whakamakia nga ringa e whawha ana i nga mea tapu; kia whakamakia ano te ngakau i roto, he ngakau maru he ngakau iro e mohio ana ki ona hara. Ko nga ngutu hoki, kia pera me o te poropiti, i whakapakia ki te waro mura i te aata, he mea mura tonu ki te ahi a te Atua, he mea kaha ki te korero.

He pena taku korero ki tenei Hui, inahoki ka taha tatou nei ki Reneti ki te wa i whakaritea e te Hahi kia ata rapurapu tatou i te ngakau, e whakatata ki te Atua me te mahara ki o tatou hara ki o tatou he: ma te Atua e mea kia makere noa iho nga mekameka e mau nei ki o tatou ringa, e watea ai tatou ki te mahi ki a Ia, kia marere iho hoki nga unahi i o tatou kanohi e marama ai te titiro ki te Atua, ki taua hoki e pai ai mo te tangata.

Kia tahuri tatou ki te mahi, ki te rapu tikanga e tupu ai, e ora ai te taha Maori o te Hahi. Ko te tino mate e pa nei ki a tatou inaianei he kore moni. Ko te mea tenei e mate ana ahau no toku tunga hei Pihopa mai ki tenei ra. Kua kore noa iho taua mate mehemea kua mahara nga tangata katoa o te Hahi he wahi ratou no Te Karaiti, tera ano he mahi ma ratou mo te tinana. Mehemea e pera

ana kua mutu taua raruraru kua ranea hoki nga taonga hei hapai ake hei whakanuku haere i te Hahi.

Ehara i te mea he moni anake e hapa ana, e hapa ana hoki te tangata. Kahore e rite te tokomaha o nga Minita ki nga Pariha. He nui noa iho te Pariha, takitahi hoki te Minita. Ko etahi kainga o te Pariha e kore e haeretia i te marama kotahi. He aitua tenei: te korenga o te Minita e ahei te tirotiro tonu te ata mohio ki te iwi o te Pariha. He aha ra te take e kore ai e kitea he tokomaha nga taitamariki e mea ana kia whakapangia hei Minita. Ehara i te wehi ki te uaua o te mahi. Tirohia te taua ka haere nei ki te whawhai ki Oropi, mehemea e 5000 nga tangata mo taua taua kua kitea noatia. Ehara i te wehi - kahore, he mea ke te take; ka kitea nga kaumatua kua ngakau kore, kua kaiponu i te moni mo te Hahi, kua kore e kakama ki te whakatoro haere i te Hahi. Ka mea nga taitamariki, kua whakapono kore te kaumatua, hei aha te whakapono ki ahau?

Kia ata rapua e tatou tetahi putanga i tenei raruraru. Ko etahi Pariha, kahore ano kia tuturu te Hahi. He ruarua te hunga whakapono e mahi uaua ana i waenganui o te hunga whakaponokore - he pera a Ruatoki - kotahi te Minita e mahi ana i reira, me te manaaki ano te Atua i tana mahi, engari kahore ano kia kaha te Hahi ki reira. E taea e ahau te tono mea a te Pakeha hei tautoko i te Pariha pera, me te whakaae ano te Pakeha he mahi pai tera.

Ko nga pariha katoa ia o te takiwa o Turanga mai tae noa ki Te Kaha, me te nuinga o era i te Takiwa o Heretaunga, me to Rotorua he rereke noa iho. Kua tuturu noa te Hahi ki reira, e taea hoki e ratou te whangai i o ratou ake Minita, he Tahua Oranga Minita ano hoki o reira. Ehara i te mea meake e puta te wa, kua puta noa mai inaianei e kore e tika kia tangohia tetahi moni o waho hei whangai i te Minita. Ka nui toku hiahia kia waiho tenei tikanga hei tohu whakawhetai ki te Atua mo te rau tau mai o Te Matenga. I te tau 1903 ka mutu te tukutuku moni mai a te Komiti i Ranana. I taua tau i mea te Pihopatanga o Otautahi kia tukua mai e £300 i te tau mo te taha Maori o te Hahi. Inaianei ia kua mimiti taua puna wai, ara kua whakaputaia ketia ki etahi wahi o te ao e noho tonu i roto i te pouritanga. Me whakawhetai tatou ki o tatou hoa me te whakaae he tika ta ratou.

I mea ahau kia waiho tenei mei hei tohu whakamahara ki a Te Matenga. E hoa ma, whakatika tatou ki te mahi kia marama ai ta tatou whakawhetai ki te Atua. Ehara i te mea kia rapua ko o koutou ake minita anake kia ora, engari kia puta ake te uaua o nga Pariha kaha hei tautoko i nga Pariha kahakore, e watea ai te taha Pakeha ki te tautoko i te mahi ki era atu wahi o te ao.

Kia mohio te iwi Maori ki te hoatu i ana mea ki te Atua, he mea e rite ana ki ta te Atua manaaki i a ia, katahi nga taitamariki ka kite i te nui o to koutou whakapono, e mea hoki kia uru ano ratou ki te mahi hei Minita ma te Atua.

Kia mahara tatou ki a Te Matenga, ae ra, ki tetahi nui ke atu i a Te Matenga, ara ki a Te Karaiti, i whakakahore ra ia i a ia ano mo tatou, ma reira e kitea ai te kaha, te ora o te whakapono o te iwi Maori.

Kua meatia e au tenei mea, ara te moni, hei take nui mo taku korero ki a koutou, inahoki he mate nui tera no te Hahi inaianei. Tera pea koutou e mea "He take no waho tena, he mea e kitea ana, ehara i te wairua." He tika tena, he ahakoa ra ma te mea o waho e kitea ai te mea wairua o roto. Ko te pouaka hinu he tohu no te aroha nui o te wahine, ko nga patene e rua he tohu no te ngakau atawhai o te pouaru, ko te urupa hou he tohu no te ngakau u tonu ki te Ariki. Ki te mea e ka ana te aroha i roto i te ngakau tera e kitea ana mahi hei tohu. "E kore rawa te aroha e taka." Otira ma te mahi anake e kitea ai.

Kia kotahi ano taku kupu mo te taha wairua. Kei te mohio koutou ki te Mihana kauwhau kua tu ki etahi wahi, he mea pai hoki nga hua o aua Mihana. Kua kite au i tetahi kua whakarere i te waipiro, i tetahi kua tahuri ki te whai i te Atua, he hua ena no te ata kauwhau i te Ripeka o Te Karaiti. Heoi e mea ana au kia tu te Mihana ki etahi pariha i te wa e rite ana ina kitea hoki he tangata e tau ana ki te mahi. Kia mahara te Minita ehara i te mea he karakia, he kauwhau ta tatou mahi, engari he kume i te wairua tangata ki a Te Karaiti.

He ano mo te Whare-Karakia. He mea pai kia ahuareka a roto o te Whare-Karakia. Kia ata hanga a waho kia kaha, kia pai. Pai ke atu o koutou ake whare i o o koutou matua, kia pai ke ano te Whare-Karakia onaianei i to mua I te mea kua tuturu te iwi ki tetahi kainga, kia hanga i reira he Whare-Karakia mau tonu, he mea pereki ranei, kowhatu ranei. Tera ano tetahi whare pera ki Manutuke, te mea i whakatapua e au i tera tau. I mea nga tangata o reira kia whakairohia nga poupou kia pera me era i wera i te ahi. Tera ano he Whare-Karakia hou ki Ohinemutu ki Ruatoki ki Takapuna. I kite hoki au i te whakapai o nehera kua whakaurua ki te Whare-Karakia onaianei. He pai tena, kia penatia etahi atu Whare-Karakia. Engari ahakoa he mea tawhito te WhareKarakia tera e taea te whakapai a roto. Ehara i te mea pai kia nui ke atu te whakapai o te Wharerunanga i to te Whare-Karakia. E kore e korerotia inaianei nga mahi katoa mo taua mea, ma koutou e korerorero. Kotahi ia te mea e hiahia ana ahau, ara he ripeka kia tu i runga i te Tepu

Tapu. Kia pai te hanga o taua ripeka ahakoa rakau, ahakoa parahi. He tohu hoki te Ripeka no to tatou whakapono tapu hei whakamahara mo te aroha mau tonu o Te Karaiti i hoatu nei i a ia mo tatou: he Ripeka tu noa, kia mahara ai tatou ki to tatou Ariki i mate, ae ra, i ara ano mo tatou, kei te ora tonu hoki ki te rangi.

Ma te Atua tatou e manaaki, mana o tatou whakaaro e tohutohu hei whakanui i tona honore i tona kororia.

KUPU WHAKAMARAMA.

KI oku hoa Minita; e hoa ma kia kaha ki te awhina mai i ta tatou pepa. Na tatou katoa te pepa nei; no reira ma tatou katoa ano hoki e awhina. Tukuna mai nga mahi o o koutou pariha kia pereihitia He tino mea pai tonu tenei,

ara te ripoata i a tatou mahi ehara i te mea hei whakamanamana ma tatou; engari hei mohiotanga mo tatou kei te penei a mea me ana mahi; kei te penei a mea me ana mahi. Tuarua ka kitea nga wahi e uaua ana nga mahi hei reira huri atu nga whakaaro o nga mea e mama ana a ratou na mahi i runga i te ngakau inoi kia whakakahangia nga mahi o aua wahi, kia whakamamatia hoki nga taimahatanga. He tino awhina nui tenei mehemea ka tukua mai e koutou kia ripoatatia nga mahi o o koutou pariha; era atu korero ranei e rawe ana hei pa nuinga haeretanga ma tatou ki nga wahi katoa e tae ana Te Kopara. Tenei ano hoki tetahi me inoi atu au ki a koutou, ara kia kaha koutou ki te whakaako i te iwi ki nga painga o tenei mea o te niu pepa. Ka tino porangi te pakeha mehemea ka hapa tana korero i tana niu pepa. He aha te take ? ko te take no te mea kua kite ia i nga painga o te niu pepa a kua noho tonu taua niu pepa ko tetahi wahi ano ona. Mehemea e kaha ana te awhina mai i ta tatou pepa ka rite te hiahia o etahi e mea nei kia puta ta tatou pepa i nga wiki katoa. Inaianei kei te tino kore rawa atu i te awhinatia. "Ko te Etita raua ko te Kaiperehi kei te hihiko; ko te iwi ia; me koutou me aku hoa minita kei te ngoikore."

Whangaia ta tatou manu; tukuna mai he huruhuru mona; he kawenga mana. Kaore ha nga minita poromangere rawa atu nei ki te tuku korero mai mo Te Kopara ko nga minita tonu o te Pihopatanga o Waiapu nei. E ngaringari ano a Ngapuhi, me Poneke keukeu ai, ko Waiapu tonu ano mehemea tera kua hemohemo ona minita. E hoa ma e hara i te amuamu ki a koutou engari he kawenga na te hemanawa. He tino mahi uaua tenei ma te tangata kotahi ara te kimi i nga korero e tino hangai ana mo ta tatou manu. He pai noaiho mehemea koianei anake te mahi, tena koa he huhua nga mahi o te kainga nei; he taumaha hoki. Ka inoi atu ano au ki a koutou whakamamakia mai nga mahi o ta tatou pepa. Kia ora koutou i roto i a koutou mahi katoa. Mana koutou e awhina; mana e koutou e whakakaha. Heoi ano. Na to koutou hoa pononga i roto i te Ariki,

W. P. RANGIHUNA,  Etita.

HE KAI MA TE KOPARA.

MAEHE. - Rangi Te Patu, 5/-; Waiheke Tureia, 5/- APERIRA. -  H. Tuterangi, 10/- MEI. - Materoa A. Parata, 5/-; R. E. Karaka,  5/-; Huirama Tukariri, , 5/-; Wiremu Te Hau, 5/

TE PAIPERA TAPU. IV.

I NGA whakapaparanga o mua he hanga ongeonge tenei mea te pukapuka, he mea ata tuhituhi ra hoki e te ringaringa o te tangata. I te mea kahore ano kia kitea e te tangata te mahi perehi i te pukapuka he nui rawa te moni e riro ai i tetahi te Paipera, kihai rawa hoki i taea e te tokomaha te hoko. Engari inaianei kua ngawari noa iho, ina hoki e panuitia nei ki Te Kopara he rua hereni kau nei me te hikipene e riro ai tetahi tu o te Paipera reo Maori i te tangata e hiahia ana ki te hoko; ma te mea ka whai tetahi kia ahua pakari te kiri a waho ka nuku ake ai te utu. Heoi kahore he take tika e noho Paipera-kore ai tetahi. He mea ano tenei e nui ai te whakawhetai ki te Atua nana nei i homai te ngakau mahara ki te tangata hei rapu i nga mahi i tino ngawari ai inaianei te utu o te Paipera, i tatanga ai ki nga tangata katoa e hiahia ana ki te ako i nga mea e pakari ai ki nga mahi pai katoa, e tutuki ai hoki ki te ora tonu.

He mea ngawari rawa nei te Paipera reo Maori ki te hoko tera e mahara te tangata tauhou kua rato katoa i te Paipera nga tangata Maori o te Hahi. Otira kia tae ia ki tetahi kainga e tu nei te whare-karakia, he whare ataahua kia kite i te tokomaha o te tangata e huihui ana ki reira ki te karakia, kotahi rawa pea te Paipera e kitea e ia ki reira. Katahi pea ia ka mahara ko nga Paipera a te iwi kua mahue atu ki te whare o tenei, o tenei. Kia tomo rawa ki nga whare titiro ai, katahi ia ka mohio ki te mate nui o taua kainga, he Paipera-kore. Ko nga tangata o te kainga he tokomaha, ko nga Paipera, kia timata te tatau ki te koromatua o te ringaringa kahore e tutuki ki te koroiti. Engari pea te Kawenata Hou e kitea ki etahi tokohia ranei, ko te tokomaha kihai ano i rato. Katahi ka ki taua tangata tauhou nei, "He whakaparahako ta tenei iwi ki nga pukapuka e whakaatu nei i te ora mo te tangata, ina hoki kahore i whai ngakau ki te hoko i te Paipera."

Tera pea etahi e ki, ahakoa kahore he Paipera, tenei ano kei te rongo te taringa i te mea e korerotia ana etahi upoko o te Karaipiture i roto i te whare-karakia. Ehara ano ia tena i te whakarite i ta Te Karaiti whakahau kia ata whakatakina nga tikanga o te Karaipiture. Ko te whakarongo o te tokomaha, ehara i te whakarongo i tino mau ai nga kupu te pupuri, engari ko ta Hemi Apotoro e ki nei, "e rite ana ki te tangata e matakitaki ana ki tona kanohi maori i roto i te whakaata. Tona matakitakitanga ki a ia ano, haere ana, wareware tonu ake (Hemi 1, 23, 24). Ehara taua tu whakarongo i te mea e ata kitea ai nga taonga o roto i te Karaipiture, engari me ata titiro, me ata korero kia rua ki toru korerotanga, me

ata rapu, ka kitea ai nga hua. E kore hoki tenei e taea e tetahi ki te kahore ona pukapuka. I te mea hoki e whaia ana he pukapuka, kaua e kapea ketia te Kawenata tawhito, ko te Karaipiture ra hoki tera i whakahaua nei e Te Karaiti kia ata whakatakina nga tikanga, e korerotia nei hoki e Paora te pai.

Kaua tetahi tangata o te Hahi e hapa i te Paipera inaianei; kaua hoki e mangere ki te ako; otira me matua inoi te Wairua Tapu hei whakamarama, ko ia ra hoki te Kai whakamahara i nga tangata tapu a te Atua na ratou nei aua pukapuka i tuhituhi (2 Pita 1, 21).

TE WHAWHAI.

NO nga ra whakamutunga o Mei nei katahi ano a Itari ka tino uru ki te whawhai. I tae te waea a te Kingi o Itari ki a Kingi Hori he whakaatu nana: "Ka piri pono ia kia Ingarani a mutu noa te whawhai." E kore ia e whakamutu takiwa noa i tana whawhai engari kia rite katoa te korero a te Kotahitanga pera ano i te oati kua takoto i waenganui i a Ruhia, te Wiwi me Ingarani.

E toru nga pa o Ahitiria kua hinga i nga Itariana i roto i tenei wa poto. Ko Ahitiria kei te whakapae i runga o Itari, ko Itari kei te taha whakararo. Enei whenua kei te piri tonu. I o raua whawhaitanga i runga tonu i to raua rohe, 1600 Tiamani-Ahitiria i matemate, e 3000 i taotu; 1000 i riro herehere. E 600,000 katoa te kaha o nga Tiamani-Ahitiria e whawhai mai nei ki nga Itariana.

RUHIA.

PETROGRAD, Mei 31. I whaia e matou nga Tiamani i Hawi (Shavi). E 9 nga pu i riro mai i a matou e whitu nga pu mihini. E 3000 o te hoariri i riro herehere mai i a matou, e 60 nga apiha.

TE WHAWHAI I AIPERE.

KEI te nukuhia atu te kaha o te whawhai i konei. E kiia ana nukuhia atu te turituri o te pu inaianei i nga whawhaitanga kua taha ake. E rongona atu ana nga pu i Bruges me Ghent. Kei te whakaheke tonu mai a Tiamani i Riiti me Rukuhamupeke (Luxemburg) ki te awhina i a ratou tana.

TE WHAWHAI I TE ITA.

RANANA, May 31. I te po o te Hatarei ka taha nei ka riro mai i te Kotahitanga nga awa keri katoa a Tiamani i te taha ki matau o te awa o Iha; e 50 nga tangata i riro herehere.

NGA AITUA.

I te waea mai a te Komihana o Niu Tirani i Ranana ko nga aitua enei o te Ingarihi. E rima nga apiha mate rawa; 19 i taotu; e 253 hoia i mate, e 563 hoia i taotu; e 403 i paitinitia; e 50 kaore e mohiotia kei whea e ngaro ana.

I te Tatinera, Kotahi apiha i mate rawa, tokorua i taotu.

NGA HOIA MAORI.

Kua rongo koutou kei te pirangatia ano he hoia Maori. Ko te ope tuatahi kua whakaaetia kia haere ki te whawhai. Ko te wahi hei haerenga mo ratou ko te Tatinera.

TE KUINI KANIWARA O TURANGA.

TE moni Kua kohia e Turanga nei i runga i te whakahaere Kuini Kaniwara e £22,000 makere atu. Tera ano e panuitia nga korero o tenei Kaniwara. Ko te tamahine a Henare Roihere o Uawa i tu hei Kuini. Hei te 3 o Hune nei ka karaunatia. Ko te ra whanau tenei o to tatou Kingi. 

HE RETA TUKU MAI.

Ki a W. Ratapahi, Theological College, Te Rau.

E Pa, tena koe.

Tenei kaore e nui nga korero i runga i te Raruraru i tenei wa. Heoi ra tenei. Kua tae mai ki te kainga i whakaarotia mai ai e te ngakau. A kua kite nga kanohi i te Moana Whero, i Maunga Hinai, i nga whenua i haereere ai nga tamariki a Iharaira. Ka nui ra te koa o te ngakau.

E hoa ka nui to maua pai, ka nui hoki te aroha. Kaua hei maharahara mai, kia ora, kia kaha ki tau mahi. Hei kona,ma te Matua tatou e tiaki.

Na to tamaiti,
H.M.T. Warrimoo, Suez.
G. R. REWA.

HE TURE TUTURU.

1. Kotalhi putanga o TE KOPARA i te Marama.
2. Ko te oranga mo te pepa e rima hereni (5/-) i te tau, me nooti o te poutapeta me pane ranei.
3. Ki te hiahia te tangata ki te tango i TE KOPARA me tuku mai e ia te moni i roto i te reta whakaatu mai.
4. E pai ana kia tukua mai nga korero o ia wahi o ia wahi o te Motu, engari kei te Etita te tikanga mo te ta i aua korero; kia marama te tuhituhi.
5. Me penei te tuhi i waho o nga reta katoa:

Ki TE KOPARA,

Te Rau, Gisborne.

HE PANUI.

Ki te hiahia te tangata ki te Rawiri ki te Himene: he nui noa atu nga pukapuka kei a au inaianei: ko te utu:

He mea nui, kiri noa, 2/6.
Rawiri & Himene, kiri whero, 2/.
He mea nui, kiri whero, 3/.
Rawiri & Himene, kiri pai rawa, 4/.
He mea nui, kiri pai, 4/.
Rawiri, Kawenata, & Himene, kiri whero, 3/6.
He mea nui, kiri pai rawa, 5/6.
Rawiri, Kawenata, & Himene, kiri pai rawa, 5/6.
He mea paku, kiri whero. 1/6.
He Himene, 6d.
He mea paku, kiri noa, 1/.
He Kupu ma te Ngakau Inoi, 3d.
He mea paku, kiri pai rawa, 3/6.

Rawiri & Himene kiri noa, 1/6.


Maku e utu te pane kingi hei tuku atu i nga pukapuka ki a koe.

Na H. W. WILLIAMS,
Naurea, Gisborne.

Ki te hiahia te tangata ki te Paipera ki te Kawenata me tono ki te BIBLE DEPOSITORY SUNDAY SCHOOL UNION, Auckland.

Paipera, 2/6, 3/6 4/6, me te pane kingi 1/-
Kawenata me nga upoko whakamarama, 2/6, 3/-, 4/6, me te pane kingi 3d.
Kawenata paku, me nga Waiata, 2/-, 2/6, 3/-, 3/6 4/-, me te pane kingi 3d.

Printed and published by H. W. WILLIAMS, at Te Rau Printing Works, Berry Street, Gisborne, New Zealand.