![]() |
Pipiwharauroa 1899-1903: Number 136. July 1909 |
![]() |
1 1 |
▲back to top |
Te Pipiwharauroa HE KUPU WHAKAMARAMA. NAMA 136. GISBORNE. " He ao te rangi ka uhia, He huruhuru te manu ka rere.' HURAE 1909. "KUI! KUI! WHITIWHITIORA." TE PIHOPA O WAIAPU. NO te 30 o na ra o Hune nei i mutu ai te tu o te Wiremu Renata i te Pihopa- tanga o Waiapu. Ko te take i mutu ai tana mahi na te mea kua kumatutia ia, kua kore e taea e ia te haere nga wahi tawhiti o tona pihopatanga. I te 13 o nga ra o tenei marama ka tu he po poroporoaki ma nga pakeha o Turanga ki te Pihopa. I te whaikorero a Rawiri Karaha i taua po i mea ia kia karangatia ano hoki e nga Maori tetahi ra ma ratou hei poroporakitanga hoki ma ratou ki te Pihopa. I nga kupu whakahoki a te Pihopa i whakamihi ia ki te kupu a Rawiri, a i mea ia ki te tohungia ia e te Atua, me waiho taua ra mo te Raumati, mo te wa pai mona mo te kaumatua ki te haere. E tino whakamihi ana matou ki te whakaaro o Rawiri, he tika hoki. He mea tino tika kia poroporoaki nga Maori ki tenei kauma.- tua. mo ana mahi pai ki te iwi Maori, mai i tona tamarikitanga tae noa mai ki tenei ra. Ahakoa kaore i tae nga Maori ki te tunga i tumanakotia e ia, ko te mea nui ke ko te pai o te tumanako o tona ngakau mo te iwi. Kua kaumatuatia ia ki roto i te mahi. I nga ra o mua i kite ia i te nui o te whakapono o te iwi, i kite ia i te pai o te noho me te mahi a te iwi i runga i te rangimarie. I mohio ia ki te pai o tenei whakapono, no te mea i kite ano hoki ia i te noho kino o te iwi i nga whawhai o mua. Ko ona hoa kua ngaro ki te po, he toko iti rawa e ora nei. Ko tona ahua he oha na te iwi kua ngaro, ko te take tenei i tika ai kia poroporaki- tia ia. Oa korero o te whakapono o te iwi Maori mai i te timatanga tae mai ki tenei ra i pau tonu ki roto i te oranga o tenei kaumatua. No te 22 o Hurae 1829 ia i whanau ai, a no taua tau ano ka iriiria ratou ko na tamariki tokowha a Rawiri Taiwhanga. Ko nga tamariki Maori tua- tahi tonu ki te irira. No te tau 1840 ka nuku mai tona papa (a Wiremu Parata) ki Turanga. No te tau 1848 ka haere Id Ingarani ki te whakatutuki i tana kura. No te mutunga o tana kura ka whakapangia ia hei Rikona i te tau 1853 Kaore i roa i muri iho ka hoki mai ki Niu Tireni, i mahi tonu ia i raro i tona matua i Turanga. No te tau 1859 ka whakatupua tona matua hei Pihopa tuatahi mo Waiapu. Ko te kainga noho o te Pihopa ko Waerenga-a-hika, ko te tunga hoki tera o te mihana me te kura a te Pihopa. No te putanga o te whawhai a te Hauhau i Waerenga-a-hika, ka heke mai te Pihopa i reira noho rawa atu i Nepia, ko te tama, ara ko te Pihopa nei, i noho ki te taone o Turanga. E tu nei ano tana kura i Te Rau- kahikatea inaianei, no taua wa mai ano. No te tau 1876 ka mutu te tu pihopa o tona papa, he kaumatua ano te take. I tono te Hinota ki a ia kia tu hei Pihopa i taua wa, kore ana ia i whakaae. No te tau rawa 1894 no te haerenga o Pihopa Tuari hei Mihinare ki Pahia, katahi ano ia ka whakaae kia meinga hei Pihopa.
![]() |
2 2 |
▲back to top |
TE PIPIWHARAUROA. No te 20 o nga ra o Hanuere 1895 ka motuhia hei hopa. Tona matua i mua i a ia i mutu kaumatua i te tunga Pihopa, tuku iho nei ki a ia i pera ano. Ko te tumanako a te ngakau mona ki roa atu ano ona ra e whakanga ana i te tautanga o tona ra, kua roa nei hoki ia e mahi ana, mai i te ata a taha noa te tikakatanga. HE POROPOROAKI KI TE PIHOPA O WAIAPU. HAERE ra, e Koro, te matua o nga iwi e rua, o te Pakeha, o te Maori. Ko koe te whakamaunga o nga kupu, me te tirohanga kanohi a te hunga kua riro ki te po. Ka nui te pouri o te whakaaro, me te tangi hoki o te ngakau, mou kua tuku nei i tou turanga honore me tou nohoanga tapu ki tetahi atu. Ko koe me ou matua nga kai-hautu i nga waka e rua o te Pakeha me te Maori i roto i nga ngaru pua o te marangai me te pouri tuaikerekere. Haere ra, e Koro, i runga i te whakatau-ki e ki ana " Ka pu te ruha, ka hao te rangatahi." He kaka: waha-nui koe ki runga ki nga marae o nga iwi o nga hapu, o nga reo, o nga huihuinga tangata. Kua tau tenei koe kai runga i te pae, e titiro whakatatare ki tua o te arai. Ka mutu tou •whakatopa i waenganui i ou iwi e rua. Ko te tumanako a tou iwi Maori kia tu mai ano tetahi hei Pihopa, kia pena ano me koe te u •ki runga ki nga waka e rua. Heoi ra, e Koro, haere, e hoki ki tou kainga. •Ma Ihowa, ma te Atua o nga mahi aroha noa katoa, koe e manaaki, e tiaki mana e whaka- .roa nga ra o tou-kaumatuatanga i runga i te mata : o te whenua. Haere, e Koro; ki te pai te Ariki ka kitekite ano tatou. Heoi ra, e Koro, haere, e to matou Pihopa, e to matou he para. Haere! Haere!! Haere!!! Nga Ngatikahungunu o te Wairoa. HE WAIATA MIHI KI A TE PIHOPA, NA NGATI- KAHUNGUNU. Tera te marama ka mahuta i te pae Ra runa mai koe, ko au hei raro nei Tiro noa atu ai ki vvaho ki te moana; He kurunga poti mai nou e Pihopa. Ko au te eke atu te teera o waho, E ahu ana ia te tai ki Ngamotu. • Mokai Taupiri nana rawa i arai Te kite atu au te wa ki a Te Weu. Torona mai tou ringa: hariru taua! Na, Warawara taikiha, e! HE TANGI KI A TE PIHOPA, NA NGATI- KAHUNGUNU. . He maunga a tu noa na puke i uta ra, e; Ka ngaro hoki ra taku wakaruru hau, e, Taku kotikoti hono, e ra, Waerenga te pahi, e ra, Kia tu mai koe i te korero o te toa, e. Utaina atu ra ki te ihu o te waka, e; Tena ka paea ki te awa i Ahuriri. I whea koia koe ra Te whakakau mai ai i te whakakau o tetahi, e, Rumano i waho ra, hoake ki uta ra, e, Te kauika tuarua whakarerea mai ra te kakau o te hoe ra Hei waha i a koe, Koi taka te tapu atea, ei! 11. Tera te whetu te ukapo ana mai Te tara ki uta ra, e, Kia tohu ake au ko koe ka hoki mai, e ra. Hoki mai, e Koro, ki o taua takanga e; Tenei hoki au te kaiarohi nei, e; Ka riro ia koe i te whakarewarewa, e, I te hikitanga atu i te hiki Raukatauri, e ra, I hiki matapo na Rua-tangata-matua, e. HE MIHI AROHA KI TE PIHOPA O WAIAPU I TONA TAENGA KI A NGATIRANGIWEWEHI. . Kai pae koe, e Koro, • Ki te noho tahi mai. Ka toriki ki tawhiti, Ka rau au te mahara. Waiho me mihi iho Ki ou ripanga nei, e, Ki ou takanga nei, e, Waiho rawa hai manuka. 11. Kai torohu ai te aroha i ahau, e Mehemea koe, e Koro, e kai ana i ahau Nau ka huri atu ki tua o na rae o Turanga ra, e, Nana i arai mai; Kihai rawa i huri mai kia munaia atu. e, Kia mauru ai te aroha ki te whare. HUI katoa te moni i namaia e Tiapani i ta raua whawhai ko te Ruhia nei pauna 18o, ooo, ooo. Ka kino te haere a te whawhai, mate tangata, mate moni. Kua tukua a Tianara Toera, raua ko Tia- nara Nepukatoha ki waho o te whare herehere. Ko enei tangata i tukua ki ro whare herehere mo te he a raua whakahaere. Ko Tianara Toera te tangata nana nei i pupuri a Pota Aata. Puta rawa mai nei raua ki waho mate ana o raua ahua.
![]() |
3 3 |
▲back to top |
HE KUPU WHAKAMARAMA. TE HAERENGA O TE KAWANA KI NGA MOUTERE. NO te Mane te 4 o nga ra o Hurae nei i hoki mai ai te Kawana i nga Moutere o Kuki, ara i Rarotonga, i Mangaia, i Atiu me Aitutaki. Tekau-ma-waru ona ra e ngaro atu ana. Ko Rarotonga te moutere tuatahi i tae atu ai ia, engari kaore i u ki uta. Ko te mou- tere tuatahi i u ai ia ki uta ko Mangaia. Kaore i roa ki reira. He haka nga mahi ki a ia i nga moutere katoa. I tenei moutere ko tetahi mea i mauria mai ki tona aroaro ko te whakapakoko o Tane, ina te nui. Ko roto he puare, tomo ai nga tangata ki roto ma ratou e whakaoreore ona ringa, e whakahurihuri nga whatu, e whaka- korero hoki te waha. He nui nga taonga i tukua mai mana i konei. Ko te rangatira o tenei whenua ko Hone Ariki. I te moutere o Atiu, he pera ano nga mahi me o Mangaia, engari he pai ake nga haka. He tino toa taua atu nga Maori o Atiu. Ko te rangatira o konei he kuini, ko Kuini Wairua- rangi (Vailualangi). Ko te haka a tenei iwi ko ta ratou patunga i nga tangata o Mitiaro. He tino pai atu, ano kei te mahi ano ratou i tau whawhai. Te taenga o te kawana ki Aitutaki he pera ano nga mahi me o era moutere. Ko te haka a tenei hunga ko te wehenga a Tane Mahuta i a Rangi nui raua ko Papa. He pai ano tera haka. Ko Rarotonga te moutere whakamutunga. He haka ano ta nga Maori o konei, engari kaore i pera te pai me era o nga moutere, na te mea kua pakeha rawa te ahua o nga tangata. Ko te rangatira o tenei whenua ko Kuini Makea, he wahine kua kaumatuatia. I te po ka tu he ngahau whakanui mana i te kawana ko te ata o tahi rangi ka hoki mai te Kana. TE KOTAHITANGA O TE HAUAURU. Ki te Etita o Te Pipiwharauroa. EHOA, tena koe. Ki te pai koe tukua enei kupu torutoru kia kite iho o tatou hoa e tango ana i ta tatou pepa. No Ngakura Teaohou o nga tau 52 te hoa wahine o Teaohou Nekitini, no te 7 o na ra o Hune nei i mate ai ki Putiki- wharanui. E toru na ra i tangihia ai ia e ona iwi i Putiki, katahi ka haria ki tona kainga ki Parikino E ono na ra e tangihia ana i Parikino, katahi ka nehua ki te taha o ona matua. He nui na iwi i tae mai o te Taihauauru nei kite tangi ki a ia. I tae mai ano hoki a Ngatikahungunu ki Heretaunga, ki Petane, ki Tangoiho hoki. He nui te aroha o nga iwi katoa ki tenei wahine no te mea he wahine rauhi tanata, he wahine rauhi i na tikanga nunui a ona iwi, me na tikanga nunui ano hoki e pa ana ki na iwi katoa o te motu nei. Kia mohio mai hoki koutou na tenei wahine te hui tuatahi i tu mo te kotahitanga i tu ki Parikino i te tau 1892, i karanga- tia ai na poropiti i runa i te motu nei, me te kini, me na iwi, kia tae ki Parikino, ki reira tirotiro ai i etahi huarahi e ora ai te iwi Maori. I tae mai ano hold a te Kooti me ona iwi, otira nga iwi katoa o te motu nei i tae maiki Parikino. Oti ake i reira te kupu me whakakotahi na iwi katoa o te motu nei. Ka timata i konei te Kotahitanga. I taua tau ano ka tu ki te Waipatu, muri iho ki te Waipatu ano, muri mai ki Pakirikiri. Heoi ka rauna haere i te motu nei tenei taonga te Kotahitanga, akiaki noa ake ko Papawai. I roto i enei mahi ko te reta ki te Kuini Wikitoria. Te whakahokinga mai ko te whakahau ki te Kawanatanga kia hana he ture motuhake mo te Maori. Te putanga mai koia na kaunihera e hoe nei i te motu nei. Ko tenei wa- hine he wahine tautoko tonu i na tikanga whakatupu i na iwi katoa. He wahine hapai hoki i te whaka- pono o te Hahi Mihinare. Kati i te ra i nehua ai ia, i hana tetahi tikanga whakakotahi e ona iwi. Ko taua Kotahitanga tenei. Heoi ano. TANGINOA TAPA. TE WHAKAKOTAHITANGA. No te 7 o nga ra o Hune ka whakatakotoria te kupu a Whanganui, a Raukawa, me era atu hapu i hui mai ki te matenga o Ngakura Teaohou. Ko ia tenei— " E tono ana me Whakakotahi enei iwi—A Whanganui, a Ruakawa, a Tuwharetoa, a Maniapoto, a Ngarauru, a Ngatiruanui, a Taranaki, a Ngatitoa, a Ngatiawa, a Ngatimaru, a Ngatiapa, a Ngawairiki, a Rangitane, a Muapoko, a Ngatiwhiti, me era atu iwi. Kia whakakotahi i raro i na tikanga pooti mema e haere mai nei, me era atu tikanga. Na, Takarangi Metekingi Taumata te Ngarupiri Hori Pukehika Henare Roera Henare Tumango o Honoiti Ranapiri Teati Paetaha Hui Teh uri Maehe Ranginui Rere Neketini Rapata Rangitahua Kerehi Roera Henare Haeretuterangi Hapae Whiniata Pauro Marino Riria Tehuruhuru Nepia Tauri Raiha Waitohi Toa Rangitaha Ngapara Tekakakura Reneti Tekaponga Natana Tehiwi Hamara Tewhaingaroa Haimona Ranapiri Merania Patapu Patua Uruteangina Na Whanganui me Ruakawa. [He whakamarama ake mo na Kaunihera Marae. Ko taku i mohio ai na te Kotahitanga o Te Aute enei Kaunihera i whakaturia ai. I te tau 1899 ka
![]() |
4 4 |
▲back to top |
4 TE PIPIWHARAUROA. tu te hui tuawha a taua Kotahitanga ki Taumata- omihi, wahi o Waiapu. I taua hui ka pahitia tenei motini:—"E mohiotia ana he tikanga ano ta mua mo te peehi i nga tikanga kino katoa o te kainga. Ko etahi o aua tikanga kei te mau i nga Runanga Maori. Na enei Runanga i iti ai te kai waipiro me te haurangi i na kainga. E mea ana tenei hui kia tonoa atu ki te Kawanatanga kia tukua mai he mana rahi ake ki enei Runanga, ta te kawanatanga i whakaaro ai e pai ana." I tukua tenei motini ki te kawanatanga, a no te tau 1900 ka tukua mai e te kawanatanga ko nga Kaunihera Marae.—ED.] TE AROPEREINA. KO te hanga i te Aropereina, ara i te waka rere i te rangi, te mea tino nui kei te whakaarohia inaianei e nga tangata mohio katoa ki nga mahi nunui. Ko te mea nana i whaka- kaha tenei whakaaro na te mahi tauwhawhainga a Ingarani raua ko Tiamani e mahi nei inaianei. Ko nga iwi kua tino kaha atu ki tenei mahi ko te Tiamana raua ko te Wiwi. Kua whakapaua e enei mana nunui etahi moni nui i te hanganga aropereina. Kua oti i a raua tahi etahi mea pai. E kiia ana ko te waka o Tiamani te mea pai atu o nga mea katoa kua oti. I te kitenga hoki ra i te pai o taua mea ka kiia me whaka- mutu te hanga manuao o Tiamani, engari me hana aropereina. Kati ko te mahi a tenei tangata inaianei he tino whakapai rawa atu i te hana o tana waka. Ko nga kupu mai o Tiamani inaianei kei te hanga tetahi waka nui, ko te kaha o te mihini whakahaere e 500 hohipaoa, ko nga tanata e taea e ia te mau e 54 Kua oti ano hoki i te kamupene hanga i taua waka tetahi rama nui, e kitea ai te topito i te po pouri ahakoa e 9 maero te tawhiti atu. E kiia ana ano hoki kua oti tetahi arai mata mo te aropereina e kore ai e pakaru ina puhia. Ahakoa kaore a Ingarani i te pera me Tiamani raua ko te Wiwi, engari kaore ia i te noho noa iho. Kua oti i tetahi tangata o Ingarani tetahi waka, ko tera tonu tetahi o nga tino waka kua oti inaianei, e taea ana hoki ra e te waka a taua tanata te rere te 30 maero i te haora. Kua tae mai hoki nga rongo kua oti i tetahi tangata o Niu Tireni nei tetahi waka, a ki tana korero he pai ke atu tana i nga mea katoa kua oti. I kore ai e taea e ia te hanga tana i Niu Tireni nei, he kore mihini mama mo runga. E haere ana ia ki Ingarani mahi ai i tana waka, hei reira kitea ai te tika o ana korero mo te pai o tana. Kua oti katoa nga tauwira o tana waka. Kua tae mai ano hoki nga rongo o tetahi aropereina kua oti i tetahi tangata o Airana. Mahi huna ai ia i tana i te po kei kitea. Hei nga po ia ka whakarere, ka whakawhiti mai i Airana ki Ingarani. I enei ra ka taha ake nei ka kitea tetahi aropereina e rere ana i Ingarani i te po, nui atu nga korero mo taua mea, i kiia hoki he waka tutei no Tiamani. Ki te korero a taua tangata ko tona waka tera e rere ana. Ka nui ra te tauwhawhainga o nga mana nunui inaianei mo te hanga aropereina. Kaore ano i tae mai nga tohutohu mo te ahua o tenei waka. Engari he parirau ona hei whakamanu i a ia. Ko te mea whakahaere he kuru penei ano i to nga tima nei. Ko te mea uaua ko te timatanga atu ki te rere. He mea hanga ano te wahi hei timatanga mo tana rere, ko taua mea he reera roa, nuku atu i te 100 iari te roa. Whaka- nohoia ai te aropereina ki runga i tenei reera. He mea mahi ano tetahi piringa nui (spring) hei timata i tona haere. Te mea hei whaka- pumau i te haere he weeti e toru koatu tana te taumaha. I te mea ka timata te mania haere a te waka nei i runga i te reera, ka timata hoki te huri a tona kuru, kia pau te 100 iari e mania haere ana i runga i te reri ka timata tona manu ki te rangi. E ki ana tetahi turi- turi nui atu mehemea ki te rere te aropereina, rongona atu ana ahakoa hawhe maero te tawhiti. Ka huri ra nga kupu mo tenei waka hou a te pakeha. Hei te wa e tino pai ai tenei waka, ka rereke katoa te ahua o nga mahi o te ao. Ka kore hoki he maharaharatanga ma te kawa- natanga ki tenei mea ki te rori, ki te piriti, me era atu mea. Kua kore he wahi tapu, ara kua rori nga whahi katoa o te rangi, tera ranei te tangata e whakawa mo era o ona hea i te rangi. TE HUNGA KORE MAHI. TETAHI mate nui kua pa ki Niu Tireni ko te kore mahi. He mea kino tenei mo te Tominiona. I enei tau maha ka huri nei kotahi tonu te ahua o te korero mo Niu Tireni, he whenua e rerengia ana e te waiu me honi. Apiti atu ki enei pai o te whenua, ko etahi tikanga pai i mahi e te Hetana, ka tahi ka nui rawa te haere o nga rango pai o Niu Tireni. I tenei ra kei te rapu noa era atu whenua i te take i pa ai tenei mate a te kore mahi ki tenei whenua momona. Kotahi tonu te rongoa a nga nupepa katoa o te koroni nei, me whakatuwhera nga whenua kia whakanohoia e te tangata. He tino karanga tenei na te pakeha no mua iho, na te panga mai o tenei mate ka kaha atu ta ratou karanga. Ko nga mea ra enei kei mua i te Maori e takoto mai ana, kati kua puta te kupu a ta tatou manu he pai tonu taua
![]() |
5 5 |
▲back to top |
HE KUPU WHAKAMARAMA. mea mehemea ka pai te whakahaere a te Maori, engari mehemea ka kino; he tino mate e puta mai i roto. Ko te mea nui hei mahinga inaianei ko te wehewehe i nga whenua. E ki ana tatou ko te he he kore no te Kawanatanga e whakanui i nga Tiati he whakawa i nga whenua. He tika ano tenei, engari kaua e utaina atu anake te he ki raua tangata, me ki ano kei a tatou ano tetahi wahi o te he. Mehemea ko te tika anake hei korerotanga ma te tangata i roto i te kooti tera noa atu e mama. He mea pai kia whakamahara ta tatou manu i a tatou ki enei mea kei rokohanga waretia tatou e te aitua. Kei nga taone o Akarana raua ko Poneke kua nuku atu i te 3000 nga tangata kua kore he mahi, ko etahi o ratou he hunga whai tamariki. Kaore he taone i hapa. Kei Otautahi he nui atu. Kei Turanga nei he nui ano, ko etahi kei te mate i te kai. Ko te Kawanatanga me nga komiti whakahaere o nga taone kei te rapu mahi ma ratou. Kua timataria i Poneke me era atu taone te kohikohi moni hei whangai i nga tino mea he rawa o ratou. Ko te ahua tenei o te mate nei i tenei ra. TE HAERE A TE ARAWA KI AMERIKA. NO te 5 o Hurae nei i haere ai te ope o te Arawa ki Amerika. Ko te take o taua haere he mahi waiata. No te taenga mai o nga manuao o Amerika i tera tau ka kite i te pai o nga mahi Maori, o nga haka, o nga waiata me era atu mea, ka pa te hiahia o etahi o taua hunga kia haere he ope Maori ki Amerika. I korero ano etahi o ratou i mua o to ratou haere- nga, kia tae ratou ki Amerika ka whiriwhiri ratou tenei take, ki te pai ka tukua mai e ratou he tangata hei tiki mai i nga Maori. Ko te tutuki- tanga tenei o nga korero a aua tangata. Ko te roa o te ope nei e ngaro ana tekau-ma-tahi marama, kotahi marama e rere atu ana, kotahi marama e hoki ana mai, e iwa marama e mahi ana. Tetahi ra nui na te Arawa mo te haerenga o tenei ope. I te ata i rere atu ai i Rotorua ka emi te tangata ki te teihana he tangi te mahi na te tieki kainga na te ope haere hoki. Ko nga wahine i mahue iho kua pau te wiki nuku atu ranei e tangi ana ki a ratou tane. Me te mea ano ko te ra i te Tiuka ra te rite o te nui o te tangata ki te teihana o Rotorua. Ma te kamu- pene i Amerika e utu nga raruraru katoa o tenei haere. Ko o ratou waka haere, atu i konei tae noa mai ano hoki ki te kainga nei, he karaihe tahi katoa. Ko nga moni ma ratou e £3000. Haere ake tenei ope e 40. Ko o ratou ingoa enei—Horomona, Pirika, B. Gordon, Te Wiremu, Tamarahi, Rangitauira, Te Toiroa, Te Haimona, Hare Piripi, Tuoro, Te Kiwi, Taima, Hautu, Te Hata, Teeo, Te Pohe, Ngamihirau, H. Meihana, Hemi Rongo, Hika- tarevva, ko nga tane enei. Nga wahine:—Te Rua, Rinaha, Kahira, Ngautauta, Hepi, Ku- rauia, Mihitereina, Kirimatao, Ngatomokanga, Ewa, Maata, Miriarangi, Heti Yates, Erena Haretaunga, Ani Ngarimu, Heni Hautehoro. Koia nei a te Arawa kua riro nei ki Amerika. NGA RONGO O TAWHITI. KEI te noho haere mai te Ha (te kingi) o Ruhia ki Ingarani kia kite i a Kingi Eruera. Ko tetahi wahanga o nga tangata o Ingarani kaore i te pai, ko te take na te kino o nga mahi a te Ha ki nga Hurai, me era atu tangata i raro i tona kingitanga. Ko nga mahi e kinonga nei ko nga kohuru. E mea ana aua tangata kaore e tika a Eruera kia kite i te tangata whakamana i nga mahi kohuru. Ko tetahi tangata e mea ana kia haere ki te mutunga mai o te ao ma runga paruna. Kua tae mai nga rongo kua pakaru te whare o tona paruna i te hau. Kua nukuhia e ia tana haere mo tera raumati. Ko nga wahine o Ingarani e noho mai na kei te whawhai ki te paremata kia tukua atu te mana pooti ki a ratou. Ko tenei tohe kua timata noa atu, kati kaore ano i whakaaetia e te kawanatanga. Kua tino kaha rawa atu te tohe a nga wahine. Kua tahuri ki te pakaru- karu i nga wini o te paremata, ki te whakaeke ano hoki i nga pirihimana. Kua tokomaha o ratou kua hopukia ki te whareherehere mo a ratou mahi kino. Na enei mahi i tino uaua rawa ai te paremata ki te tuku atu i ta ratou tono. Etahi tangata tokorua o te Wiwi nui atu te kaha ki te tautoko i nga mahi rere rangi. Kua tukua mai e tetahi o raua hawhe miriona moni hei utu i te kura whakaako i nga tikanga o tera mahi. Ko taua kura me tapiri atu ki te kura nui o te Wiwi. Kua tapiria mai ano e ia tetahi atu 15,ooo i te tau mo taua kura. Ta tetahi o raua i homai ai e 700, 000, kia whaka- rungia nga mahi rere rangi ki roto ki nga, tunga nunui e whakaakona ana i nga kura. No enei ra nei ka tae mai te rongo o te ko- hurutanga i tetahi o nga tangata rongo nui o te
![]() |
6 6 |
▲back to top |
6 TE PIPIWHARAUROA. kawanatanga o Inia. Ko taua tangata ko Wi- remu Waere, he Ingarihi, na tetahi Inia i pu- puhi. Tae ana te weri weri ki nga wahi katoa mo tenei kohuru. Ko te Inia nana nei te kohuru he taitamaiti, i hoki mai i Ingarani i nga kura nunui. I reira ka whakakiia ia e etahi tangata ki te kino o te whakahaere a Ingarani, ara a te kawanatanga o Inia. Ko tana whaka- rerenga tera i tana mahi kura, ka hoki mai ki te kainga. I tuhi mai tona tuakana ki a Waere kia korero ki taua taitamaiti ki whakarere i era whakaaro, kati i korero tera ki a ia, engari kaore i rongo. No te po i tae ai a Waere ki tetahi hui ka puta nei tenei raruraru. E hoki mai ana ia i taua hui ka kite te tamaiti ra. No raua e korero ana ka maunu i tamaiti ra tona pitara ka puhia e ia Waere, e wha rawa nga tangina o tana pu. I mau tonu ia i taua wa. He tino nui atu te pouri o te nuinga o nga tangata o Inia mo tenei kohuru. Kaore he mutunga mai o te matauranga o te pakeha. Ko tetahi o nga tino mea whakamiharo kua kitea e te pakeha, a he mea hoki ku mahia nuitia, ko te waea kawe korero, kaore nei ona raina. Mehemea e rua nga kaipuke kei te moana, a he mihini korero a raua, e ahei noa atu raua te korero ki a raua, ahakoa e 500 maero to raua tawhiti. He mea whakamiharo atu tenei, kaore he raina kaore he aha, enari e ngawari noa iho ana enei kaipuke te korero ki a raua. Kaore i mutu mai i tenei, engari kua kitea e tetahi tangata he tikanga e taea ai e nga mihini o nga kaipuke te tuhituhi nga korero a tetahi ki tetahi. Rite tonu te pai o na tuhituhi ki o te nupepa. Kei te Mirikana anake nga tu mahi katoa. Tenei etahi tikanga hou kua whakaturia e tenei iwi mohio. Ko te mea tuatahi he ra whakanui i te koka, kua takoto tenei hei ture mo Merika. Kotahi te ra i te tau e whakaaro ai ia tangata ki tona koka. Ko taua ra he ra nui, he ra e whakahonoretia ai te koka. Me tae he kupu ma te tangata i taua ra ki tona koka, ahakoa i whea ia. Ko nga mahi katoa ka kati, he koa anake te mahi mo taua ra. Ko te putiputi hei mauranga ma te tangata i tenei ra he kanei- hana ma, te tohu o te tika, o te pai. Ko te take tenei i karangatia ai tenei ra ko te ra o te kaneihana ma. Ko te mea tuarua ko te mea kia whakaakona nga mahi o te kitini i nga kareti me nga kura nunui katoa o te whenua. Kua tu tetahi kotahitanga ki Merika, ko tana whai kia whakaritea tenei tikanga. Ki te ki a nga kai whakahaere o tenei kotahitanga ko te tino putake tenei o te nuinga o nga raruraru i noho kino ai etahi kainga. Ehara i te mea mo te kohua anake i te kai, engari mo nga mea katoa e pa ana ki nga mahi o te whare te hoko i te kai, i te kaka te kohua i nga tu ahua kai katoa nga mea pai mo roto i te whare, e kore ai e moumou noa te moni. Enei tikanga e rua he pai anake. HE AITUA NO TE MOANA. I PAKARU tetahi kaipuke ki te moana, ki te taha ki te Rawhiti o Ahitereiria. I ahu mai taua kaipuke i Merika. He maha nga ra i akina ai e nga tuatea nunui o te moana, tae rawa mai ki Ahitereiria ka u ki runga toka. I muri tonu iho i te tutukitanga, ka puea te kohu, ka kite hoki kei te taha ratou o tetahi moutere iti ki te Rawhiti o Ahitereiria. Ko te kaipuke nei i mau tonu ki runga i te toka, engari ko nga rua, me nga wahi putunga kai ki tonu i te wai. Ko to ratou mate he kore wai he kore kai hoki. I hanga e ratou he mokihi hei ara atu mo ratou ki te moutere ki te rapu wai i reira. I a ratou e hanga ana ka akina te kapene me te mete e te ngaru mate tonu atu. Ka haere tokorima ki te moutere ki te rapu wai. I a ratou e rere atu ana, ka kawea e te mate wai tetahi o ratou, ka unu wai tai, ko te porangi- tanga rere tonu atu ki te moana. I a ratou i reira ka ua te awha, katia atu ana ratou mo nga ra 14 Na taua ua ka whai wai ratou. Tae rawa mai ratou ki te kaipuke, rokohanga mai kua matemate katoa nga tangata i mahue iho, kotahi rawa ano e ora ana. He hanga whakaaroha nga korero a taua tangata mo nga mea i mahue iho i runga i te poti. Ko nga mea whakaaroha rawa ko nga tamariki a te kapene, me tona wahine hoki. I kaha ano ia ki te ruku kai ma nga tamariki engari ehara i te kai totika. Na wai ra i ora nga tamariki ra a ka mate katoa. Rokohanga mai e nga mea i haere ki te tiki wai, e takoto ana ia e karanga ana ki a ratou kia kawea atu he wai mona. I kite ano ratou i tetahi tima e rere ana, waitohu noa mai ratou kia peka atu kore rawa. Mei peka atu taua tima tera e ora te nuinga o ratou. - Na te tima tuarua rawa ratou i kite. Te taenga atu o te poti tiki mai i a ratou ki te taha o te tima ka tangi te hipihipi a nga tangata o runga tima mo to ratou whakaoranga. Kohia tonutia atu e nga tangata o runga tima £105 hei aroha ma ratou ki tenei hunga. Ko te tangata i ora nei i runga i te kaipuke kei te porangi tonu, kaore ano i ata marama ona whakaaro. Tirohia! Te tangi a Te Pipiwharauroa wh. 12.
![]() |
7 7 |
▲back to top |
HE KUPU WHAKAMARAMA. HE MATE PORANGI TE HARA. KI te mate whakamomori te tangata ara ki te patu i a ia ano, ka uiuia e te ture te ahua o tona matenga a ki te kitea nana ano ia i whakamate ka penei te ahua o te whakatau a te huuri: "I mate whakamomori tenei tangata i te mea e porangi ana." Na, ki toku whakaaro ko te tangata e mahi ana i te hara, kahore nei ona whakaarotanga ake ki te pai, he porangi, he tino porangi. Kei te mohio i a tatou te ahua o te porangi, kua ngaro nga whakaaro, kua kore e mohio ki te pai ki te he, ki te mahi ia i te mea kino kaore e whakama, kahore ona wehi i te mate, ka rere totoa tonu, kahore e. whaka- rongo ki nga tohutohu a nga mea ora. Tena ina tirohia e tatou nga mahi ate tangata kua aronui nei ki te kino. Ko te tangata hara e patu ana i a ia ano—he mate whakamomori. Kua wha- kangawaritia e nga toto o te Karaiti te huarahi ki te ora tonu otira nui atu te wehi o te tanga- ta hara kei eke ia ki te huarahi o te ora. Tona rite kei te hoiho e oho na ka whakatata- ha haere i te huarahi pai ma te huarahi kino, e topoko ai, e tu ai, e taka ai ranei. Ka mate te hoiho i te wai ka aroha te tangata, ka mea ki te mau i te hoiho ki te awa otira nui atu te wehi o te hoiho i taua tangata aroha, katahi ka rere ki runga o te taiapa ka tu te puku i te pou, ka haea te uma e te waea koikoi, a mate ana taua hoiho. Na tona whakaaro kore na te mea he kararehe ia i pera ai. Otira na te aha te tangata e wehi nei i a te Karaiti? Kei te aroha a te Karaiti ki a ratou kei te mea mai, "Haere mai ki ahau e koutou katoa e mauiui ana e taimaha ana, a maku koutou e whakao- kioki." Kei te mea ano te Wairua raua kote Hahi, "Kia haere mai hoki te tangata e hiainu ana kia tangohia noatia ano te wai ora e te tangata e hiahia ana." Kei te pehea te tangata hara ki enei kupu aroha? Kaore i te whaka- rongo engari kei te whawharo haere te ihu penei i te hoiho matakana kei te tu te waero ki runga. Ehara ianei tenei i te tohu no te porangi? Rere ai te tangata porangi ki te ahi penei ano me te tangata e rere nei ki runga ki te ahi a Hatana. Kahore ona wehi no te mea kua huri ona whakaaro. I te huri o nga whakaaro o etahi tangata kei te pohehe ratou he pai ke atu te mahi i te kino i te mahi i te pai, he pai ke atu te reinga i te rangi. E whakamanamana ana etahi tangata ki a ratou mahi kino, e mea ana ka whakamihia ratou e nga tangata o te ao. Na to ratou porangi i penei ai o ratoa whakaaro— kua hemo o ratou hinengaro. He aha ianei te take e takakino noa nei te kotiro ataahua i tona ingoa pai? Na te porangi, kua paihanatia te matapuna o nga whakaaro e te hara. He aha ianei i tuhi tiaki ai te taitama ahakoa e mohio ana ia he mau he mutunga mona, kaore hoki he tangata tuhi tiaki e ora ana? He aha ianei i noho ai a Hare Matenga i te ngahere mo nga tau e rima me i hoki mai ia ki te kainga e poto noa tona nohoanga ki te herehere kore noa ranei? He porangi. He aha ianei i ho- kona ai e Hura Ikariote tona Ariki mo nga moni e toru tekau? I porangi ia i te nui o tona ngakau apo a tarona ana i a ia. I tahae- tia e tetahi tamaiti o Te Aute he kahu maori i roto i tetahi whare. I hokona e ia etahi ki te taone o Turanga nei ki te wahi ano i tahae- tia ai e ia, ko etahi i huna ki raro o te whare. Hei huna i tona tahae ka tahuna e ia te whare i te ahiahi tonu. I kitea te ahi ka tineia, a i tae ano ia ki reira korero ai mo te waimarie o te kiteatanga o te ahi. Ka puta nga tangata ki waho ka tahuna ano e ia nga kakahu i roto o te kapata. No te hokinga mai o nga tamariki no ratou te whare ka kitea te ahi tuarua, a ka tae ano tamaiti nei ki reira a moe iho ki roto o taua whare ano. No muri mai ka kitea kua ngaro nga kakahu maori, ka rapurapu te ngakau na wai ra tenei mahi kino, ka rapurapu ano te nanakia nei. No tenei wa ka kitea ia e mau ana i te mowhiti taimana i te mekame- ka pounamu ara ka whaki tonu i tona hara kua whakahopu tonu hoki nga ngakau o nga hoa na Tuta tonu i tahae nga kahu maori, i tahu te whare. No te taenga atu o te pirihimana ki te hopu i a ia ka oma ki te parae no muri mai ka kitea tona tinana kua pirau kenana ano ia i paihana. I mua atu i tona matenga ka pai- hanatia e ia te kuri a tetahi kuia. He tama- iti pai a Tuta, he ngawari, engari i uru a Hatana ki roto i a ia me te rewera i uru ra ki roto i a Hura, a porangi ana ia. E kore to- nu e hapa te mau o te hara o Tuta he hara marakerake otira i tona porangi ka mahara ia ka ngaro. Ko wai te tangata ehara nei i te po- rangi e tahae e tahu i te whare, e paihana i a ia ano—mo te aha? Heoi ano ra mo te mo- whiti koura mo te mekameka pounamu. E te tangata kia tupato kei porangi hoki koe i te hara.—R.T.K. NGA HUA KAREAO MA TA TATOU MANU. Rua te Herata, Chatham Islands, 5/- Ragimarie Hapi, Swanson St., Auckland, 5/- Patupatu Keepa, Otorohanga, 5/- Harata Aratapu, Turanga, 5/- Poihipi Turei, Port Awanui, 5/-
![]() |
8 8 |
▲back to top |
TE PIPIWHARAUROA. TE HAHI O NIU TIRENI. UPOKO V. NO te tau 1836 ka tae te rongo ki Pewhai- rangi o te huringa o Ngatiporou ki te whakapono i runga i te kauwhautanga a Tauma- takura. Ka mauria mai e Wiremu Karuwha (Henare Wiremu) tokoono nga reimana hei awhina i a Taumaakura. Tokotoru i whaka- nohia ki Waiapu, tokotoru ki Turanga. Ko tenei tangata ko Taumatakura i riro herehere i a Ngapuhi i nga whawhai. I a ia i Pewhairangi i haere ia ki te kura. Kaore ia i roa e kura ana ka whakahokia i te tau 1834 Kaore i mohiotia he ngakau nui ano tona ki te whakapono, no te mea kaore ia i tuku i a ia kia iriiria e nga mihi- nare. Otira no tona taenga ki tona iwi, ka whakakiia tona ngakau ki te kauwhau i te rongo- pai. He nui atu te wehi o te iwi i a ia, a e kiia ana he maha nga mea whakamiharo i mahia e ia. I te tau 1839 ka mahue a Waimate i a Wiremu Parata, ka haere mai ia ki Tu ranga. He tino nui atu te huringa mai o nga Maori o te Tairawhiti ki te whakapono. Ki te ki a Te Wiremu e hui ana te 1500 ki te karakia i te ata i te ahiahi. Ki tana ki ko te kaute o nga Maori i tona taenga mai e 36, 000, o tenei kaute 8600 kua huri mai ki te whakapono i runga i nga mahi a Taumatakura. He penei ano te huringa o Ngatiraukawa ki te whakapono. He pononga te tangata nana i kawe te whakapono ki reira. Ko te ingoa o taua tangata ko Ripahau. I whakahokia mai ano hoki ia i Pewhairangi. I a ia i reira ka akona ia ki te korero pukapuka, me te tuhituhi. I tona taenga ki te kainga ka timata tona ako i te iwi, me tona whakaatu ano i tona mohiotanga. Te rongonga o Tamehana, te tama a te Raupa- raha, i ana kupu ka haere mai ia kia akona raua ko tona taina keke ko te Whiwhi. E ono nga marama i ako tahi ai ratau i runga o Kapiti. Ka mohio haere a Tamehana.raua ko te Whiwhi ki te korero pukapuka, me te tuhituhi, ka haere raua ki Pewhairangi. Tahuri noa o raua matua ki te mahi kia noho raua, kore rawa i taea. Ko ta raua haere i haere huna. To raua taenga ki Waimate, ka korerotia ki a Te Wiremu Karuwha ta raua haere atu, ara he tiki mihi- nare hei ako i to raua iwi. Ka riro mai i a raua ko te Harawira (Rev. O. Hadfield. I tu tenei tanata hei pihopa tuarua mo Poneke, no te tau 1905 tonu nei ia i mate ai). I haere mai ano a Te Wiremu ki te kawe mai i a Te Harawira. Rokohanga mai a Te Rauparaha raua ko Te Rangitake e noho riri ana, a na Te Wiremu i hohou ta raua riri. I tohetohe ano raua mo Te Harawira, ko te Rauparaha e mea ana hei a ia, no te mea na tona tama i tiki ko Te Rangitake e mea ana hei a ia no te mea he nui ke atu tona hiahia me to tona iwi ki te whakapono i to te Rauparaha. Whakataua ana e Te Wiremu me noho a Te Harawira i a raua tahi, i tetahi wa ki tetahi, i tetahi wa ki tetahi. Ka iriiria a Ripahau ka huaina tona ingoa ko Hohepa; ko Te Whiwhi i huaina ko Henare Matene ko te tama a Te Rauparaha i huaina ko Tamehana. I te hokinga o Te Wiremu i haere tonu ia ma raro ki Paihia, nuku atu i te 300 maero te roa o te whenua i haere e ia. I tona hokinga atu nei ka whaka- tikina e ia a Whanganui, kia kitea mehemea e ahei ana kia whakaturia he mihana mo reira. No Aperira 1840 ka whakaturia he mihana ki Whanganui, ko Meihana (Mason) te kaiwhakaako. No te tau 1843 ka paremo a Meihana ki te wai i Turakina, tonoa mai ana ko Te Teira (Rev. R. Taylor) mo tona tunga. No te tau 1855 ka haere a Te Teira ki Ingarani, ka tukua mai ko Te Taka (Rev. A. Stock), hei whakahaere i te mihana. I te tau 1840 ka huri katoa a Aotearoa ki te whakapono, kua taea hoki ra a Waiapu, a Otaki, a Whanganui, me o ratou rohe katoa, nga wahi kaore i taea mai i nga wa o mua atu. He tino tau nui atu tenei i nga tau katoa mo nga mahi o Niu Tireni. E wha nga take i meinga ai tenei tau he tau nui. Tuatahi ko te tau i mohiotia ai i huri a Aotearoa katoa ki te whakapono. Tuarua ko hainatanga o te Tiriti o Waitangi, i tukua atu ai e nga rangatira o te iwi Maori te mana o Niu Tireni ki a Kuini Wikitoria. Tuatoru ko te ata whakanohoanga o Niu Tireni e te Pakeha. He mea ata whakatu marika he kamupene hei whakanoho i Niu Tireni. Ko te kai whakahaere o te kamupene ko Wikiwhira (E. G. Wakefeild ). He tino kamupene nui tenei, he pai ano hoki tana mahi, mei tika te whakahaere a nga rangatira. Ko te pai o te kamupene nei ko te kowhiti tangata mai hei noho mo Niu Tireni. Ko tetahi take nui tenei pai ake ai a Niu Tireni i era atu whenua, ko ona tangata tuatahi he hunga whiriwhiri anake, a e mau nei ano taua painga inaianei. Ko nga tangata whaka- noho tuatahi o Ahitereiria he herehere, ko nga - tangata -kikino katoa o Ingarangi, a e mau nei ano te ahua inaianei. Ko nga tangata tuatahi ki te haere mai, ki raro i te mana o tenei kamupene no tenei tau i haere mai ai, e ruanga kaipuke nana i mau mai. Te take tuawha i rongo nui ai tenei tau na te mea i whakaturia tetahi ropu whiriwhiri pihopa mo nga Koroni. Ko to ratou hiahia kia whaka- ritea katoatia nga tikanga a te Hahi o Ingarani i Niu Tireni nei. Ko to ratou whakaaro ko te kauwhau i te rongopai ki nga pakeha i Niu
![]() |
9 9 |
▲back to top |
HE KUPU WHAKAMARAMA. 9 Tireni He wehe ke tenei ropu it te C.M.S. i te ropu nana nei i kawe mai te whakapono ki na Maori.' Ko to ratou na hiahia nui kia whakaturia te Hahi o Ingarani ki Niu Tireni, kia hohoro tonu ai te tipu ake o te Maori raua ko te pakeha i runga i te whakapono kotahi. Aha- koa hoki kua huri a te Aotearoa ki te whakapono i te kauwhautanga a nga mihinare, kaore ano te iwi i mohio noa ki nga whakahaere e pumau ai te whakapono. Ko nga tikanga a te Hahi hei pu- puri i te whakapono kei te tao. Ko to ratou whai kia hohoro te whakatu i tetahi pihopa mo Niu Tireni, i mea hoki ratou ki te tu he pihopa, ka whai katoa ake i raro i a ia nga mea katoa a te Hahi. He ropu nui atu tenei, ko ta ratou mahi he whakapumau i te whaka- pono o nga wahi kua huri mai ki te whakapono, ehara i te mea ko Niu Tireni anake engari ko era wahi atu ano hoki o te ao. (Taria te roanga.) NGA KARAIPITURE. HOANI KARIHOTOMA. HE mea pai ano kia titiro tatou ki nga tohutohu a nga tangata o mua mo te korero a te tangata i nga karaipiture. Ko enei kupu ka tuhia nei he tohutohu na Karihotoma ki nga tangata o tona takiwa. Ko ana kupu enei—"E kore rawa e mutu taku tohe, mo nga Karaipiture kia waiho hei korerotanga ma kou- tou. Ehara i te mea hei roto anake i te whare karakia ka korero ai, engari hei roto ano i o koutou whare, hei nga wa hoki e noho huihui ai koutou. Na kaua etahi tangata e whakaputa mai i enei kupu anuanu " He mahi ano taku, he whakawa." " Ko au kei te mahi maku." "Ko au he hoa ano toku, he tamariki hei whangainga maku, me mahi au i enei." Ta tetahi, " Ko ahau ehara i te tangata korero karaipiture, engari he kai mahi. Waiho ma nga tangata kua rere nei i te ao, kua rere nei te tihi o nga maunga." He aha i penei ai tau ki e te tangata? Ehara koia i te mahi tika mau te korero i nga Karai piture, ma te tangata e karapotia ana e te tini o nga raruraru? Tika rawa atu mau tena mahi, ta te mea hoki ko tera hunga kua okioki, kua rite ki te kaipuke kua tae nei ki tetahi kokorutanga raru. Tena ko koe, kei te akina ano e nga ngaru o te moana. Kei roto tonu hoki koe i te parekuratanga, ko ratou kua pahemo atu ki tahaki. He tangata kiri maku koe, he ngaunga patu, a e tika ana kia maha nga mea hei whakaora mou. No te mea hoki he maha noa atu nga mea hei whakararuraru, hei whakaoho i a koe kia riri, ki te pouri hoki, hei whakanui hoki i te whakaii i te whakapehapeha he maha ano hoki nga mamaetanga e karapoti ana i o tatou taha, he mano ano hoki nga pere e koperea mai apa ki a tatou o ia wahi, o ia wahi. Koia i tika ai kia uhia katoatia o tatou tinana ki nga puku- puku tapu." Tenei ano tetahi o ana korero. " Ko nga tangata o te Hahi kua takoto noa ake he mahi ma ia tangata, ma ia tangata; ehara i te mea ko ia anake kia ora, engari hei mea e ora ai te tokomaha. He mea whakaatu ano tenei na te Karaiti. Nana koki i hua, ko nga karaitiana he tote, he rewena, he maramatanga; ehara i mea e whiti ana ki a ia anake, engari ki nga tangata i roto i te pouritanga. Na ko koe he maramatanga, ehara i te mea mou ake tou maramatanga, engari hei whakahoki mai i te hunga kua marara. He aha te pai o te maramatanga, ki te kore e whiti ki te hunga e noho ana i te pouritanga? He aha te pai o te Karaitiana ki kore e riro mai tetahi tangata ma te Karaiti, ki te kore e whakahokia mai tetahi tangata ki te pai? Waihoki ko te tote, ehara i te mea hei rongoa mona ake, engari hei rongoa mo nga mea kei pirau. Me pera hoki koe, kua meinga hoki koe e te Atua hei tote wairua, hei rongoa mo nga wahi e tata ana te pirau mau e whakaora mai ratou i reira, e hono mai hoki ki te tinana ora, ki te Hahi. Na reira hoki koe i kiia ai e te Ariki hei rewena. Na ko te rewena ehara i te mea hei rewena i a ia ano engari hei rewena mo te puranga katoa. He ahakoa iti noa taua rewena e taea ano e ia te puranga nui te whaka- pupuni. Waihoki ko koutou, torutoru noa nei, ki te mea he whakapono to koutou, he matapopore ki nga tikanga a te Atua, ka kaha ano hoki koutou. Na ko te rewena, ahakoa iti, ehara i te mea ngoikore, engari he mea kokoi rawa, wera, kaha. Waihoki ko koutou, ki te maia koutou, ka taea ra e koutou te whakaoho era atu kia pena me koutou." HE TITOTITO, HE PEPEHA. me te ura tutu. na puhi o te Arawa. turanga Potaka. te kai rakau a Toi. he tai ka tutuki. Heretaunga hauku nui. Heretaunga ara rau. he whare no te matata. he titi whangaina tahi. he in oa araara. te inati o Tahu. te kakara o Tutunui. te ringa tan o parahia. he peka titoki. te po tutanga nui o Pipiri. he umu ka pirau. Waikato horo-pounamu. Waikato taniwha rau.
![]() |
10 10 |
▲back to top |
10 TE PIPIWHARAUROA. HE WHAKATAUKI, HE TITOTITO, HE PEPEHA. HE WHAKAMAHARA. KO nga whakatauki e mau nei i roto i nga Pipi i purua me kore noa e tae mai he kupu whaka- tika he rerenga rua ranei. Otira kaore ano i tae mai he kupu whakaatu mai ona takiwa. Me whaka- atu mai nga mea he, no te mea i tuhia enei mea hei pupuri mo enei tau e heke iho nei, kia puritia rawatia ake ai e tika katoa ana te takoto. he upoko papa no te waru. pakapaka ana. Ngatiporou waewae rakau. Turanga tangata rite. te waru kai rau. he tipua, he kai, he korero kai matai. me he ko tauranga. me te tatau whare e whanga ki te mahinga. me te tira-ao-kirikiri. ko Ku i te po. ka rere te hue mataati. na ia tou paua. tangia te wai o te waha he kukupa pae tahi. Arawa upoko tutakitaki. he waipipi, he tamatea. nga ara rau o Tangaroa. tena te tui o Rongo. ko Tutea waha paranui. mehemea kei Kakarake. me he ngarara titi. te putea iti a Mariao. he kiore pukurua. ko te manu huna a Tane. he korero no Kaimatai. he kanae rere taha tu. Heretaunga upoko pipi. Wairoa makau rau. ko Tauranga paku-kore. te taua iti a whakatau. he kaupapa haro. he korero na tai timu. ko whanui te reinga. he manu karapipiti. Ngatipaoa pukunui. he tatainga a waka ko te rau o piopio. te uru o Manohunuku. he uri no Tupataua. te aputa ki Wairau. he koko tataki. nga tai o Rangawvhenua. he parera. tau o Papoua. te maioro te keria. pa whakawairua. he moa kai-hau. te tau iti a whakanehu. te oha o tai o tangata. te kaki ururua, au mahi. he wheke punarua. he moko kakariki. ko te tini o Ruaumoko. he taitainga waka. Waikare whanaunga -kore. na Tuariki au, e hika e. te Weraiti, umutao noa. ko te umu o Mawete. ko te ao o te Kowhai. he raho pe. rau o Titapu. pa whakaruru hau. me te tumu kuku. Tamaki hokinga tahi. ko Tawhaki. he kuku horo taepa. ko te huna i te moa. te mana i a Karewa. me te wai korari. te kurapae a Mahina. he tumu herenga waka. te whanau a Punga. ko Tireki paku-kore. ko Tuhuruhuru. ko Tumatauenga. nga mahi a Rauru. tu te wheke. na taero a Kupe. Puanga kai rau. Tangaroa pukanohi nui. he tamure unahi nui. ua te Auripo. he hiore tahutahu. he hiore hume. he huru pioi. he kaka waha nui. he kuku tangai nui. he kuku tangaengae nui. he kaka kai honihoni. he kapara miti hinu. he kaka tino tanata he kakariki kai ata. he koreke puoho tata. he parera apu paru. he mate i te marama.
![]() |
11 11 |
▲back to top |
HE KUPU WHAKAMARAMA. 11 HE AITUA. Ki te Etita o Te Pipiwharauroa EHOA, tena koe. Tenei te aitua o Ngatimania- poto. Panuitia atu kia kite o taua hoa, e e noho mai nei i na marae nunui o taua motu, kia mohio mo nga wa roa e heke mai nei. Te Iwi, kia ora. No te Rahoroi e awatea ake ai, ko te wha o na ra o Hurae, i te wiki nei; ka mate a Heremaia Omipi. He nui te mamae i pa ki ona whanaunga, ki te iwi hoki. He tangata ia e whakarewa ana, ia taua i te Maori, me te hui hoki ia taua, kia kotahi he tikanga mo te Maori, me te Pakeha. Ko ratou ko ona tuakana, na Kaiarahi o te iwi. He momo tangata ano i a no te iwi. Ko te kainga o tenei ta- nata kei te taha tona o te taone o te Kuiti. Ko tona huanui ko te raina rerewe e ahu ana ki Po- neke me Akarana. Ko te matara o tona kainga e toru maero ki te piriti i Waitete o te rerewe. Ko tona whare kei raro iho o taua piriti, kei te taha maui o te piriti, ina rere mai koe i Poneke. Ko te wahi i mate ai, tua maia kotahi maero me hawhe te mamao mai i te taone. He piriti i tu noa iho ana i te raina o te rerewe, i te tuawhenua. Ko te tereina e kuku ana i raro. Kei runa tata tonu he waahi whakamataku ano e kia nei he nohoanga rehua. No te po ka mate, no te ata ka kitea e te pakeha pupuhi rapeti, me ana tamariki hoki, e takoto ana i te raina, e kaupapa ana. E toru putu te matara ina piripa. Kopu ana te toto o te takotoranga, kei te raina kaore he toto. Otira no te ahiahi o te Rahoroi ka hoki mai ia i Te Awamutu, ka tautohe raua ko tetehi pakeha, me te whakarongo atu e tetahi tangata, e ki atu ana, taua pakeha, "tai- hoa ka kite koe i taku mahi." E haurangi ana, kua maunu te koti. Tae mai ki Te Kuiti, ka tukua a Heremaia Omipi. Ka tutaki kia Hare Hetete raua ko Pakere, kai whakamaori o te Paremete. Ka inuinu ratou, e iwa na inu a te mea kotahi. Ka mea ratou, " Tatou ki te kai Tio." Ka tae ratou ki tana whare kai, e tata ana ki te tekau-ma-rua i te po. He ngahau ta ratou mahi. Te mutunga o te kai ka hoki ratou. Ka tata ki te pekanga ki te whare o Hare Hetete, ka hariru ratou, ka haere a Here- maia Omipi ka haere hoki ona hoa. Ka tae a Hare Hetete mai ki to raua whare. Ka tata ki te rua karaka i te po, ka hoki mai ano a Pakere ma ki te teihana, ki te whango i te tamaiti a Pakere kihai i roa kua tangi te whio o te tereina. Ka tae mai te tereina mo Poneke, ko te tamaiti i runa, ka haere hoki ratou ki te moe. No te ata ka kitea a Heremaia Omipi, kua mate. No te Mane i te rima o nga ra, kae tae mai te Tieipi me te Takuta. Ka hui, ka uiuia. Ka nui na kai whaki korero. Ka tonoa kia tirotirohia, kia wahia. Ka putu te kupu a te tuakana, a Hone Omipi, " Kaore ia e pai kia wahia, i te mea kei te marama te wahi i whara. ko te kohamo ahu mai ki te kanohi." Heoi tau ana ma te haurangi ka hinaki te raina. Ko te potae i taka atu, ki te taha ki mua ona. Ko tana takoto, ko te pane e takoto tika ana ki te taha ki Poneke ko na waewae ki te taha ki Auckland. I takoto ia ki te taha rawhiti o te rama. Heoi, tau ana, he mate aitua. No te ono o na ra, ka haria mai ki Otoro- hanga. Ka eke na tangihanga e 700 te nui. Ka tu na Hapu, me na kai arahi o te iwi, " Me tuku ma te Maori e titiro, kia tirohia e na mate Maori." Kitea ana nga tanata i patu. I taua ra, ka rangona te kupu, kua kitea tenei aitua e te poropiti o te tairawhiti, e Wereta, tumuaki o te Ringatu. I whaka- aria e ia te kupu, "He kohuru ki Te Kuiti, taemai ana ki mokau, ara ki roto o te rohe o Maniapoto." Na ko tenei poropititanga no mua o tenei aitua ka tae mai te rongo, na Patupatu Keepa. No tona taenga ki te tangihanga mo Airini Tonore. Tautokona ana e te murungau tikiparete, i rongo ia ki Taranaki, ki na akona a Wereta, i mua i tenei aitua. No muri mai ka panuitia te korero o te mata Maori o roto i na Hapu o Maniapoto, ka kitea e te iwi te rakau patu, he manuka. Ko te ingoa o tenei mate Maori, ko Tumokemoke Waaka. Huri ana te iwi ki te kimi i taua rakau, kei te kimi tonu. Muri mai o tena, ka tautokona e te Hinu Enoka, he mate Maori ano tenei, no te taha ki a Mahuta. Pera, te kupu, i patua ki te rakau, ko mua o te rakau i nui, ko muri i iti. Kimihia ana, kaore ano i kitea, e kore nei. Heoi no muri mai o enei ka rongo te pakeha i whakapaea nei i ngangare raua ko te tupa- paku. Patai ana taua pakeha ki a Hone Omipi, "Na wai te korero naku i patu a Heremaia Omipi, i kite hoki au i roto i te nupepa." Ka ki atu a Hone Omipi, patai atu Id te nupepa. Heoi, mutu ana enei awangawanga o te iwi. Haria ana te tanata ki te urupa i te 11.7.09. Na Taimona Hapimana, raua ko Hone Marena, i nehu. o te Hahi Ingarangi, me te Weteriana. Heoi, kia ora na iwi ma te Rungarawa tatou e manaaki. Na to koutou hoa. Na H. H. WAHANUI. Otorohanga, 9/7/09- NGA MAKETE. KA nui te pai o na utu. He hipi te mea tino pai rawa te utu, ko na hoiho me na kau ka nui te ngawari o te utu. Hipi.—Weta 13/3 ki te 19/6; Io 9/6 ki te 17/9; Hokete 9/6 ki te 14/6; Reme 10/-; ko na Io hapu 18/- a runa. Kau miraka £4/5 ki te £9 ; Kau maroke £2/2 ki te £3/5; Kawhe 19/- ki te £1/18. Ka nui te rahi o te utu o te kau hei kai; Okiha, £6/10 ki te £10/12/6. Kau uha £3/15 ki te £715 Hoiho.—Ka nui te pai o na utu. Purukaata nunui £22 ki te £34/10; mea mama £19/10 ki te £25; hoiho eke, hoiho to paki hoki £8/5 ki te £17; poni £3/10 ki te £5- Poaka. Te mea hei kai 19/6 ki te £1/11; nga punua pakeke 7/6 ki te 12/6; hei pekana £1/18 ki te £2/14/0. Kin.—Mo te kin kau he 7½d. a runa he 2½d. a raro mo te kin kawhe. Mo te kiri hipi he 6/- a runa he 2/6 a raro. Ko na makete o era wahi atu katoa nui atu te ngawari mo na mea katoa. Ko Akarana anake te wahi kei te pai tonu na utu. Parareka.—Ka nui te pumau o te utu £5/10 ki £5/15/0 Kana, 3/9 a raro, 4/2 a runa. Witi, 4/8. Pare, ki 2/9 Tiawhe, ka nui te ngawari o te utu £3/5/0.
![]() |
12 12 |
▲back to top |
TE PIPIWHARAUROA. HE TURE TUTURU. 1. Kotahi putanga o TE PIPIWHARAUROA i te ma- rama. 2. Ko te oranga mo te pepa e rima hereni (5/-) i te tau, me nooti o te Poutapeta me pane ranei, auaka i te tiaki he pane kingi hepene nga pane e tino hiahiatia ana. 3. Ki te pau nga hereni a tetahi tangata i tuku mai ai ka tukua atu he kaute. Ki te tae atu te kaute kia hohoro te tuku mai i te moni, na te moni hoki i puta atu ai te pepa ehara i te mea tupu noa. 4. E pai ana kia tukua mai nga korero o ia wahi o ia wahi o te Motu, engari kei te Etita te tikanga mo te ta i aua korero : kia marama te tuhituhi. 5. Me penei te tuhi i waho o nga reta katoa: — Ki TE PIPIWHARAUROA, Te Rau, Gisborne. HE PANUI Ki te tangata e hiahia ana ki te Rawiri ki te Himene : he nui noa atu nga pukapuka kei a au inaianei : ko te utu : — He mea nui, kin noa ... 2/6 He mea nui, kiri wher ... 3/- He mea nui, kiri pai ... 4/— He mea nui kiri pai rawa ... 5/6 H e mea paku, kiri whero ... 1/6 H e mea paku, kiri pai . . . 2/6 He mea paku, kiri noa ... 1/- He mea paku, kiri pai rawa 3/6 Rawiri & Himene, kiri noa 1/6 Rawiri & Himene, whero ... 2/- Rawiri & Himene, pai ... 3/- Rawiri & Himene, pai rawa 4/- He Himene ... ... -/6 Maku e utu te Pane Kingi hei tuku atu i nga pukapuka ki a koe. Na H. W. WILLIAMS, Te Rau, Gisborne. Ki te hiahia te tangata ki te Paipera ki te, Kawenata, me tono ki te BIBLE DEPOSITORY SUNDAY SCHOOL UNION, Auckland. Paipera, 2/6, 3/6, 4/6, me te pane kingi //- Kawenata me nga upoko whakamarama 2/6 3/- 4/6, me te pane kingi 3d. Kawenata paku, me nga waiata 2/-, 2/6, 3/-, 3/6, 4/-, me te pane kingi, 3d. Printed and Published by H. W. WILLIAMS, at Te Rau Printing Works, Berry Street, Gisborne, New Zealand.